Member-only story
為左壓抑樓市，香港政府前幾年出招，邊個本身有樓，而又想買多間，就要畀雙倍印花稅（DSD，稅率劃一15%）。
從此，出現「首置客」買家。所謂「首置客」，並唔係真係講緊佢一生人第一次買樓置業。官方定義係：「簽署買賣合約時未持有香港住宅物業的永久居民」一個人只要買某一個物業果陣，手上無任何以個人名義擁有既物業，就可以括免上述雙倍印花稅。
That’s why，近年本地傳媒經常出現「慈父」、「慈母」畀錢，買樓送畀年輕仔女既故事。
究竟呢班岩岩成年/仲讀緊書/岩岩出黎做野既後生仔女，當中有幾多真係好有迫切獨立生活既需要？當中又有幾多父母真係咁闊卓/咁有愛，願意無私贈送咁貴重既禮物？（要知道，有錢唔一定闊卓，好多有錢人信奉「親生仔不如近身錢」，鍾意拿實D錢到死果刻。）抑或，佢地只係以仔女做「人頭」去買樓收租（早前係將軍澳就有一家人搞到上報上電視，請見另文），慳返十幾巴仙既稅？實在難以分辨。
唔知係咪讀者睇到厭呢？近排，呢類「慈父」、「慈母」故事開始係報紙地產版絕跡。記者轉而報道高齡「首置客」。拿，八九十歲買樓，本身一D都唔奇，城中富豪都退而不休，為自己財富增值。但係，將之包裝為孝女送畀老父既生日禮物，就造作喇。
好似呢個case咁，阿伯本身住緊屯門，阿女同女婿使691萬，送層將軍澳新樓畀佢。
第一，老人家多數都唔鍾意臨老搬離自己住開既社區，你睇下市區重建、鄉效收地，除左R多賠償，居民最想就係原區安置就知。阿伯住緊屯門、新樓係將軍澳：一東一西、一新一舊，要適應全新環境都唔易。你話新樓係畀阿伯用黎收租咩？點解孝女孝女婿唔直接每月畀返等額家用供養？要咁轉折？
第二，阿伯咁大年紀，難聽講都聞到棺材香。孝女孝女婿「送」果層新樓，睇怕未供完已經要自己繼承返。佢地之所以唔落自己名，然後畀阿伯住。極大機會因為佢地本身有物業，但又想買多層樓。見老人家有首置quota唔好晒。大拿拿慳到78萬喎（非首置客：691萬x15%=104萬 vs 首置客：691萬x3.75%=26萬），唔係益政府下？
拿，買樓追求利潤無問題，想交少D稅更係人之常情。唔使下下包裝成慈父慈母、孝子孝女「溫馨故事」咁造作既，而家唔係拍緊晨間劇呀。
(2019–8–20)
傳送門：西米Go短評 #001–100，#101–200，#201–300
傳送門：為香港的老屎忽擔心
傳送門：一家三口燒炭死，街坊只關心樓價。
