農曆新年，鬼佬眼中的賀年食品

今日臘月二十二，仲有十日唔夠就到大年初一。英國鬼佬對農曆新年認識唔深，佢地知道十二生肖、佢地知唐人街有舞龍舞獅、打鑼打鼓、掛滿紅燈籠、放炮仗。或者，佢地有睇過BBC介紹東亞既旅遊節目。除此之外，本地超級市場都會趁熱鬧，係呢段日子推出期間限定「應節食品」賀年。今次，等我同大家介紹下，鬼佬眼中既農曆新年，應該要食咩野啦！

一、前菜/小食

炸物拼盤：炸雲吞、春卷、蝦多士，配甜辣醬。（原價3鎊，會員價2鎊半。）

蝦多士。（原價2鎊，會員價1鎊75便士。）

菜（鴨）肉飽。（原價3鎊75便士，會員價2鎊半。）

* 「Hoisin」，來自「Hoisin sauce」，廣東海鮮醬既音譯。

素菜春卷/鴨肉春卷。（原價2鎊半，會員價2鎊25便士。）

* 春卷唔單止受富豪同女明星喜愛，睇黎鬼佬都好鍾意。我去開果間超市唯獨春卷售罄，唯有用網上圖片頂住檔先。

二、飯麵

蝦仁叉燒蛋炒飯。（原價3鎊，會員價2鎊半。）

• 呢款炒飯之所以叫「Special」，係因為平時炒飯只得青豆、蛋同飯，唔會加其他料的。今次有叉燒有蝦仁實在豐富。