Member-only story
投資銀行瑞銀（UBS）出報告，話現時消費者比以往精明，會先比較不同國家網站，才係實體店購物。所以香港購物商場將會「愈來愈難做」。
報告又話，增加奢侈品牌並不可能提升商場競爭力。以香港為例，只得12%受訪者認為咁樣可以提升購買意欲。另一方面，奢侈品零售商其實唔需要太多實體店去吸引顧客，反而要減價，去拉近因為唔同國家匯率所產生既價格差距。
過去十年，香港既商場一係為左迎合中國遊客口味，瘋狂咁開化妝品鋪、藥房、金鋪同名店；一係就為左整靚「租戶組合」，清一色租畀各行業既連鎖集團。呢個現象，係銅鑼灣、尖沙咀等遊客區如是，係沙田、大埔、屯門等住宅區亦如是。大業主都趕走晒民生鋪、個體戶，唔想呢類「低端租戶」整cheap個場。
淨底單調又無特色既鋪頭、貴過人既價錢、唔關自己事既貨品（除左結婚同埋老人，仲有幾多本地人會買金器呢？）、仲要極極極多中國人，搞到本地人無野好買，無晒癮，放假寧願搵其它娛樂都唔想行商場。
好喇，而家中國土豪撒錢熱潮不再，大業主又想轉頭翻兜本地客？太遲啦。
當初係班地產商逼使我地轉去上網尋寶。外國網站，例如Amazon、Gmarket、iHerbs、樂天、eBay……價錢平過香港鋪頭，款式又多又齊，做特價果陣又唔使同班「拖gip人」搶，又唔會畀gip碌到隻腳。購物體驗遠遠好過行商場。我自己試過就返唔到轉頭喇！近幾年買野，先落實體鋪睇款、試size，然後上網落order。遇到D外國網店唔肯直接寄黎香港既，就用集運，運費又唔係貴。
一諗起唔使間接交租畀地產佬，又可以飛起代理商呢類中間人，買野都特別鬆手！
商場難做？超！佢自己攞黎賤既！
伸延閱讀：
https://hk.finance.appledaily.com/finance/realtime/article/20180116/57711508
(2018–1–17)
傳送門：西米Go昔日文章
