Member-only story
今日lunchtime，有朋友傳黎一則facebook貼文：
「粉嶺法院不批准四位曾經參予『7.27光復元朗遊行』示威者保釋，四人還押至九月三號，再上庭審訊。」
即係話，黎緊呢個幾月，佢地要係收押所渡過。反觀果班係7.21衝入西鐵站用藤條亂打人既鄉黑，就全部可以保釋。
究竟係遊行期間「藏有攻擊性武器」（寶礦力定長遮？）既市民危險D？定係有組織有預謀，仲要畀各大傳媒全程直播佢地衝入車站、襲擊市民既黑社會危險D？點解反政府果邊無得保釋？點解親政府人士就可以保釋候查？
呢D就係大公無私、頭戴「光環」既法官，所做既「公平公正」裁決？唉，我真係唔X識。
既然唔識，就要搵下專家意見。原來早係幾年前，〈立場新聞〉有個專訪（註一），訪問高等法院退休法官王式英，篇文係咁講既：
- 點解有D人可以逃離法網，不被起訴？因為律政司司長不作起訴。
「香港的檢控工作是由律政司司長全權負責。應否對某宗案件或某類案件提出檢控，是由律政司司長及代其提出檢控者決定。」
— 節錄自律政司官方網頁
高官問責制之下，律政司司長係特首提名，北京任命。係人都知，我地特首係由北京操控既小圈子選舉產生。特首拺得出黎、中共又放心確認既人選，唔使問阿貴，必定「愛國愛黨」。睇返主權移交以黎歷任司長：梁愛詩九十年代已經做廣東省人大、亦係民建聯成員；袁國強緊隨中共口徑，力撐「一國兩制白皮書」（註二）無干預香港司法獨立；而家呢個鄭若驊，唔使多講，係搞「送中條例」既始作俑者之一。
有晒前科，你仲信佢地決定起唔起訴果陣，無睇北京臉色，無淪為政治工具？反正我是不信了。
2. 邊個遴選常任法官？
香港法官係由九人組成既「司法人員推薦委員會」（JORC） 遴選，JORC成員包括終審法院首席法官、律政司司長、兩名法官、一名大律師、一名律師，與及三名與法律界無關的人士（註三）。除左終審法院首席法官同律政司司長係當然成員之外，其餘七人全部由特首任命。
特首係委任大律師同律師呢兩個位果陣，話就話須先諮詢大律師公會同律師會，但法例亦都列明，「行政長官可委任並無獲如此推薦的其他人」。即係話，特首有絕對權力，透過委任心儀人選入JORC，從而去影響遴選邊個做法官。
