Member-only story
香港報紙檔有一款「公仔書」 ： A4 size、全彩印刷、一個禮拜出一至兩期、薄薄地只有三十幾頁、賣緊二十幾蚊一本，叫做「港漫」。香港本土漫畫同本地賽馬一樣，一早已成outdated娛樂。今時今日仲會幫襯既，唔係中年大叔，就係退休阿伯。再過多十零年，睇怕會變成另一個集體回憶。
為左吸引新客，舊野需要與時並進。香港賽馬會一早就開拓賭波市場，而老牌港漫〈古惑仔〉，呢排亦引入時事元素。近三個月，作者牛佬多次繪畫「經典」新聞畫面做漫畫封面，例如防暴警察衝入沙田新城市商場、元朗站白衣人打人、尖沙咀少女被布袋彈射爆右眼等等。一幕幕觸動人心既場景，以港漫風格重現。咁既crossover，夠潮夠in之餘，又唔突屹，完全match返〈古惑仔〉既背景同人物設定。（〈古惑仔〉不嬲係「18禁」，以打打殺殺暴力見稱，同而家香港沒有兩樣。）
年青一代對〈古惑仔〉既認識，本黎只局限於二十年前同名電影系列，與及當年鄭伊健首主題曲〈友情歲月〉，只屬「童年回憶」。而家，多得呢批「貼地」封面，又再勾起佢地對漫畫原作既興趣。黃絲年青人對作者借封面發聲，控訴極權種種荒謬行徑，深有共鳴。尤其係本地商家普遍親共，常與政權統一口徑既氛圍下，牛佬此舉令人留下「有良心」、「講人話」既良好印象，唔like都唔得。黃絲紛紛落街買書，貼上社交網絡以表支持。有D仲跨張到買幾本拎黎派添！搞到有好幾期書都賣斷市，成為一時風潮。
牛佬善用時事元素去活化一本「大叔級」公仔書，開拓到新客源，係一個好成功既營銷策略。之但係，佢唔怕會得罪本身忠實fans咩？要知道港漫長期擁躉，好多都係讀書唔多，從事體力勞動既中老年人。呢班人好大部份係「藍絲」黎架喎。
原來，有四字玄機：「表裡不一」。
睇返漫畫劇情（註一），成場社會運動係由本地黑社會同台灣幫會幕後推波助瀾（2263期）；佢地搵人係「連儂牆」做大龍鳳，先貼memo紙悔辱警察、後毆打撐警藍絲（2266期）；其中一個黑幫大佬負責挑選、訓練三十個精銳古惑仔（2267期）；畀錢佢地混入遊行隊伍，堵路、設路障、掟磚（2268期）；示威期間破壞麻雀館（影射荃灣二坡坊單野）（註二）就因為幫會之間私怨（2268期）……
簡單講，〈古惑仔〉既世界觀，同藍絲Whatsapp、Wechat group瘋傳既fake news一樣。咩「外國勢力」、「暴徒」、「收錢做野」、「被人煽動」、「一小撮極端暴力行為」、「搞亂社會」統統齊全。份劇本完全跟足政府官員新聞稿入面既keywords黎度既。唔怪得班「廢老」fans睇得開心無投訴啦。
〈古惑仔〉呢本書，書如其名，真係「古惑」。封面扮晒野為社會運動發聲，用黎谷銷量；內文則暗地抹黑、污蔑同醜化示威者。面一浸，底一浸，一次過食晒「黃」、「藍」陣營兩家茶禮。以營銷策略黎講，唔畀牛佬滿分都唔得咯！
#人血饅頭 #掛羊頭賣狗肉 #兩面三刀
註：
- 〈古惑仔〉漫畫在線閱讀
- 〈示威者打爆二坡坊麻雀館玻璃 要求「福建人」出來〉，巴士的報，2019–8–25
(2019–9–10)
傳送門：西米Go短評 #001–100，#101–200，#201–300
傳送門：做個精明消費者，請睇「選擇」月刊
