Member-only story
網上流傳一封中由香港寬頻COO黎汝傑署名，致求職者既公開信。黎生話佢地招聘緊果個trainee職位有成2,700人應徵，佢只會揀其中「WOW到佢」既120人抽空一見。文末仲注明，唔好講「my mother is a woman」云云。
家下搵工連實體表格都唔使，只會寄電郵，copy and paste係零成本，click個掣就得。我敢講是但搵間有個名既公司，求其刊登一個management trainee空缺廣告，都會有一千幾百份fresh grad既CV湧入黎。所以呢，黎生以為2,700人係好多，自以為佢間野出既個offer好吸引，實在太傻太天真。
不過，下下有咁多求職者漁翁撒網，莫講話要有效率地篩選，HR淨係開晒咁多個快勞都有困難。無可否認，黎生講得岩，要吸引到interviewer注意，的確，唔可以交行貨。
黎生封公開信，內容雖然無錯，錯在寫信果個人（或佢代表果間公司）未夠班。香港寬頻，市值一百億港紙都無，既唔係行業龍頭，又唔係一間賣創意既公司，一個文職位，咁「WOW」做乜先？而黎汝傑本人呢，完全無知名度。就算用全知全能既Google，都搵唔到佢有咩傑出成就同功績。今日以高層身份，係度向後輩擺款，難免畀人一個「乜咁大支野」既觀感。
同一封信，若果出自世界級巨企，如Apple、Google、Facebook；又或者署名果個係偶像級人物，如Elon Musk、李嘉誠、甚至係香港寬頻創辦人王維基，畀人感覺就舒服好多，心都gur（註） d。呢個叫做江湖地位。
反之，只係一個名不經傳既公司高層，就變成老屎忽係度寸七七咁指指點點喇！
註：
根據《說文解字》， 「gur」呢個字解作「口上阿也」，有人認為解作「口中舒出一口氣」， 通常用黎形容條氣順唔順、妥唔妥一個人。
#老屎忽袋錢落你袋 #最緊要正字
(2018–4–7)
傳送門：西米Go昔日文章
