Member-only story
第十七回：最後一個學期的考試（上）
尋日我考埋最後一科期終試，第三個學期正式完結。呢個德國碩士課程，而家只剩番論文未寫。寫埋論文就可以畢業，到時，我唔再係一個學生。話就話never say never，但我自己知自己事，幾肯定唔係讀上PhD既材料。
出國兩年，我覺得今個學期最dramatic。用辛苦、frustrated、沉重、大上大落……黎形容就岩晒。正如上回提到，無論係讀書定人際關系，我都遇到問題。
呢個學期，我學左樣野叫Brownian Bridge，係一個統計學現象，用黎描述一樣野同時間既關系。呢條「橋」有個特點：起點同終點都歸零，而中間就無秩序咁上上落落。
搵佢黎形容剛剛過去既學期就最好不過，我既心情不斷因為唔同事情而上上落落，於開心、痛苦、快樂、擔憂之間不斷迴轉。當我以為年頭已經跌落谷底（即係寫上一篇文章果陣），誰不知低處未算低，隨後果幾日仲差，最後以極壞情況之下收場。
之但係，正如我頭先咁講，一條Brownian Bridge，無論係中間幾刺激都好，去到最後都會歸零。就好似現實世界，所有好事、壞事都隨著學期結束而沉澱落黎。係學期初新認識既交換生，而家都開始執行李，一一離開。呢幾個月所發生既事，有如電腦入面條ram既暫存資料咁；學期一完，電腦斷電，全部自動消失。
(2019–3–4)
傳送門：西米Go昔日文章2019
傳送門：80後出走德國去讀書系列
