Member-only story
第六回：超市的特價食品可以有幾平？
無論係日劇、卡通片情節，定親身去過日本，大家可能見過當地超市特價時段，顧客搶購食品既情況。我住係東京咁耐，雖然未見過師奶為左搶貨爭崩頭（可能夾唔到師奶出沒鐘數，或者日本人較顧儀態，唔會好似香港師奶咁豪邁），不過都想講下，日本超市的特價可以特得幾緊要。
以上圖為例，產自鹿兒島新鮮牛肉原價400yen/100克，超市黎講都算中檔貨，起碼平時夜晚買餸一定唔會諗。特價時段，職員就會係價錢牌隔離貼幾多折既貼紙。每隔一段時間，佢地就會貼多張貼紙，代表減多少少。Pack和牛貼住「半額」，即係話，半價就可以入手喇。 = )
唔好以為所有減價都一定係夜晚七、八點先有。以我所見，售貨員得閒就會檢查雪櫃display緊既肉幾時到期，貨多又到期日近，就會貼貼紙。當然，越快到期既就折扣越大。有唔少去到夠期前半日，已經減到半價。
呢一日我就用200yen/100克買到日本牛肉。超市每日有唔同貨種到期，就會做減價，有時係煙肉，有時係雞柳，……最平我見過四折，只要跟住減價貨黎食，可以食得又平、又多款。
順帶一提，減價貨唔局限新鮮肉類。便當、壽司、刺身一樣會減，所以去日本旅行無得開爐煮餸，又唔介意食真正平民便當既話，傍晚去超市行一轉隨時執到平野（一d都唔失禮，好多OL同上班族放工都會買黎當晚餐）。
另外一個減價食品集中地就係100yen便利店。以肉類為例，可以減到60yen/100克。本身賣100yen的一碟仔小菜，半價就係50yen。質素未必話好過得去，純粹要填飽個肚，似乎比起香港真係容易得多。
(2017–12–17)
傳送門：有血有淚。香港人在東京轉職社畜
傳送門：西米Go昔日文章
