第五回：冬天必嘗，日版吉野家邊爐

有血有淚。香港人在東京轉職社畜（しゃちく）系列

暖笠笠既日本版牛肉邊爐盛惠650yen。「大盛」只需畀多100yen。睇見都好好好想食呀真係！

熟悉的裝修，不一樣的價錢與質素。

日本同香港既吉仔，冬天一樣有邊爐。但係日本吉仔冇蟹棒亦冇豆腐，只有平時食開既牛肉加少量菜，價錢略比香港打邊爐平少少。日本冬天，隨時得三四度，食完熱辣辣既邊爐唔單止個胃，連心都暖埋，所以就算比平時的牛肉飯貴一截，仍然好受歡迎。

論質素，大家食過日本的牛肉飯，應該食得出當地賣既牛肉，係比香港好好多。原因好簡單，因為吉仔/Sukiya/松屋全部都用美國牛，比起香港分店用既大陸牛自然唔同級數。

點解用美國牛仲可以做到380yen一碗 「並盛り」（i.e. 正常份量）呢？呢個就係關稅問題，係日本，連澳洲牛肉都平過香港好多。大家下次行日本超市，見到平價澳洲、美國牛唔好以為係cheap野，只係來貨價實在低。

Obama年代，曾經傾得成的TPP都係圍繞「入口」呢個議題，果陣仲傳過，若然通過的話牛肉飯既價錢仲有得減！不過依家Trump上場，唔單止退出TPP（註），仲話要周圍加人地關稅，入口肉類減價暫時就無戲唱啦。

註：

日本吉野家的牛肉飯就分為 「並盛り」、 「大盛り」和 「特盛り」三種。「並盛り」（namimori）/「並み」（nami） 相當於香港吉野家的「細牛肉飯」，而「特盛」即特大。可能「特盛」聽起來比較特別，能吸引消費者目光的關係，香港吉野家就直接使用「特盛」一詞來代表「特大」而不另翻譯。

TPP (Trans-Pacific Partnership)，係一個多邊貿易協議，其中一個目的係削減關稅。

(2017–12–10)

傳送門：有血有淚。香港人在東京轉職社畜

傳送門：西米Go昔日文章