第二回：夏日熱辣辣，EU好熱好熱！

80後出走德國去讀書系列

中學讀地理話畀我地知，緯度越高，日照角度越細，太陽既熱能無咁集中，溫度就會低D。所以大致上黎講，越近赤度（緯度=零）既地方就越熱、越近南北極（緯度=九十）就越凍。

但原來書本歸書本，近呢個月日本、韓國原來有成四十度，比起平均三十二度既香港熱一大截。而正處隆冬天既紐西蘭都可以有十七、八度，同香港既秋天差唔多。

歐洲近排一樣受到熱浪侵襲﹐歐洲大陸西部比平均升左六至十二度。由南歐希臘﹐中間德國，到北歐瑞典，都熱到出晒火（i.e.山火）。

今次熱浪由七月尾開始﹐預計仲會持續到八月初。講到「天氣熱」，香港人個個都話「香港濕熱世界第一」（註），我都認同既。你睇下張圖：相對濕度22%！乾到呢……唔單痴笠感都唔會有，你就咁洗完衫，唔使用洗衣機fing，就咁掠出去，半日就著得上身。

仲有，歐洲呢邊無高樓大廈，唔會有「熱島效應」，熱得黎唔會焗，而散熱又會快過密質質既石屎森林。就算日頭氣溫有三十七、八度都好，太陽一落山就好快回落到二十幾度。

但係，係歐美日，冷氣機屬於稀有電器黎。窗口式、分體式，你想買都無得買。住宅唔單止無人裝冷氣機﹐大部份連風扇都無。三十幾度係屋企﹐就算除左衫都仲覺得熱。唔宅係屋企咩？走出街都唔見得好幾多。係德國，U bahn（i.e. 地鐵）、圖書館、課室、部份辦公室、食肆、……係無冷氣架！得商場、大型酒店、百貨公司、連鎖店先有。佢地最多開大風扇同噴水降溫。

本地人點消暑？咪好似你係電視新聞見到咁，去戶外噴水池玩水、浸腳l囉。又或者瘋狂食雪糕（排晒長龍），然後係戶外食！（溶得好快，功效唔大）

好彩的係，我屋企部雪櫃有製冰功能﹐用冰去做一個自然冷氣機﹐散發出黎的冷風簡直一流。

註：
一旦氣溫達「濕球溫度」（wet bulb temperature, WBT）35℃，空氣將變得濕熱難耐，人體無法排汗冷卻，健康良好者坐在陰涼處6小時內，也會死亡。WBT是指對一團空氣進行加濕，其飽和即相對濕度達到100%時所達到的溫度。而美國家氣象局已將高於31℃的WBT 列為「極端危險」。

伸延閱讀：

1. 〈Early August to bring dangerous heat wave to western Europe〉 https://www.accuweather.com/en/weather-news/early-august-to-bring-dangerous-heat-wave-to-western-europe/70005642

2. 〈熱浪侵襲歐洲國家，野火肆虐造成傷亡〉
https://news.ebc.net.tw/news.php?nid=122930

(2018–8–2)

傳送門：西米Go昔日文章

傳送門：80後出走德國去讀書系列