Member-only story
第二十六回：出走前要諗的三件事
近呢個月香港立立亂，自然多左網友私訊，問我過黎歐洲讀書、工作、長住……有咩需要注意。籍此機會，係度分享個人既睇法。我諗到咩就寫咩，希望唔會太亂。
一、
好多人諗移民 — 去歐洲又好、北美又好、大洋洲都好 — 都只會諗去邊個國家好。絕少人會進一步思考去邊個城市。
城市係由一群人組成。既然每一群人都有自己個性，佢地所組成既「城市」，自然有佢既個性、文化同特色。就算係同一個國家，各地生活模式可以好唔同。以德國為例，慕尼黑有好多跨國企業、法蘭克福以金融業為主、柏林就係IT同初創公司集中地。同樣，係其他國家（如英國、美國）都一樣，所以，大家唔好揀完國家就算，要多了解邊個地方更適合自己。
我當初主力搵柏林既工，因為鍾情於佢「Poor, but sexy」（註一）。加上柏林既IT/startup公司，對應徵者既德文無咩要求，岩晒我呢D外國人（只可惜，這些機會並不是我的，最後係柏林都搵唔到工）。大家如果想了解柏林有咩咁唔同﹐可以去Youtube 搜尋短片「Berlin: 9 reasons why the German capital city isn’t very German at all | Meet the Germans」。而點解我想係柏林返工呢？就可以參考「A Day in the Life of a SoundCloud Developer in Berlin | DevCities」。先此聲明，我都想，但我唔係software developer。（點解？因為software developer係柏林好吃香，係武漢肺炎爆發前，隨時可以有幾個job offer係手。）
二、
另一樣要注意既，係歐洲既冬天。大家唔好以為好小事，呢度既冬天相信會對好多香港人做成生活困難。「天氣凍」再加上「日照短」，長居亞熱帶南方人既心理健康一定會受影響。而呢個影響，並唔會因為你住得耐而習慣。有睇開本系列文章既朋友，可能有印象，其中有一回講我都suffer過。所以，唔好剩係諗搵唔搵到工，仲要諗埋你可唔可以係如此環境生活落去先得。
三、
最後，亦係最現實既問題，就係「人工」。人在異鄉，你要預左難以係短期內搵得番你而家係香港逗緊既人工。一黎外國稅率同其他扣減（例如各類強制保險、退休供款）比香港高好多；二黎外國公司，唔會完全承認你係香港既工作經驗；加上你又唔係本地人，所以人工一定會少左（係香港先咁奇怪，外籍員工總比本地人高人工、多福利）。如果你驚搵唔番而家咁高人工的話，我可以話你知，你既憂慮通常/多數會成真。所以，諗住離開香港前，要預計去到呢邊將會搵少左，少左既錢又夠唔夠你生活？你又接唔接受到？
係第二十三回提過，公司原先要我去另一個國家報到，只係呢幾個月全個歐洲爆發武漢肺炎而暫緩。而家疫情叫做好番D，當地移民局重新運作，開始處理我既工作簽證申請。因此，「#80後出走德國去讀書系列」好快就會完結，之後會仲寫唔寫？仲未諗……
註：
1. 〈Why is Berlin “Poor, but Sexy”?〉，DW
(2020–8–16)
傳送門：〈80後出走德國去讀書〉系列
