去過日本旅行的香港人多到數唔晒，身邊每個月飛一兩次的亦大有人在。大家又有冇試過圍埋食飯，討論日後去邊度邊度移民？
隨住人大左家庭有負擔、或各樣原因，最後，大家都選擇留在香港，只可以每個月搶$88特價機票，然後請一日年假/sick leave自製長週末，過去東京/大阪掃貨兼渡假。
好多人同我講，能夠去到日本住好幸福。當然，我都係因為鍾意日本而過去住，但實際居住當地，唔會好似旅行咁簡單容易：你地有冇見過東京市區有平價傢俬店？有冇諗過夜晚訓訓下地震可以走去邊？如果一個人在日本，病到起唔到身，又可以點？……
去任何地方生活，都永遠唔會只有「好」同「唔好」。我希望一路嚮往去日本住的人，唔好單純因為鍾意食刺身牛肉、鍾意睇演唱會、去握手會就打算移民過去；亦唔好睇完一堆content farm吹淡文章，就對產生絕對的負面評價。我希望在這裡分享在日本生活的點滴，令大家去了解這個國家真實的一面。
每一個人都可以找到適合自己生活的地方，而無一個地方可以適合全部人生活。
*註: 『社畜』(音：sha-chiku)，即係返工返到好似畜牲咁解。
(2017-11-13)
傳送門：有血有淚。香港人在東京轉職社畜
傳送門：西米Go昔日文章
