第九回：讀Master的第二年

80後出走德國去讀書系列

話咁快，已經係德國生活左一年﹐姐係話我的碩士生生涯仲有唔夠一年就完結。好快就要諗下之後條路點行，雖然我都好大機會，係番德國搵工（唔通仲做番港豬咩）。

係呢度生活左一年﹐最大影響就係整個生活節奏慢左。以前係香港咩都要快﹐行步路都好似跑咁﹐見到架巴士、地鐵到左站就起勢去追。而家行路會放慢腳步﹐就算等幾個字車都唔成問題﹐壞車﹑停服務唔會第一時間講粗口（因為都習慣晒……）。

你問我，值唔值得咁樣放低所有野，隻身去到咁遠重新發展。我可以答你：「值得。」當你仲係廿幾歲﹐你最大的本錢就係時間，錢可以再搵過。再者，我都唔係洗左好多﹐本身都只係預一年洗十萬蚊港紙。但人到三十﹐唔止得自己生活，仲開始有家庭﹐事業果陣又應該漸漸有成﹐你就唔可以再咁輕鬆，話走就走。

世界之大﹐又點會搵唔到地方容你。先問下自己，值唔值得係香港返死一世工，只係為左一層連廚房都無既樓。再者，就算畢業後，真係唔留係德國，要返香港。反正你將會用下半生三十年青春返工﹐點解唔起碼比自己兩年的時間去explore呢個世界呢？

我期待第二年的來臨。

「我認為我哋出嚟行嘅。係生係死應該由自己決定。
條路點行就由你哋自己決定。」
by 韓琛@〈無間道〉

(2018–10–3)

傳送門：西米Go昔日文章

傳送門：80後出走德國去讀書系列