Member-only story
一、
「 最痛心不是民建聯輸了議席，而是輸了後在街上聽到有人歡呼。」
— 民建聯創黨主席曾鈺成（註一）
區議會選舉上星期日塵埃落定，保皇黨大敗。大快人心，網民自發落街開香 檳慶祝，市面難得有片刻久遺了的歡欣。
曾鈺成呢個政壇老屎忽即席示範咩叫「輸人唔輸陣」。雖然民建聯既議席由一百一十七席銳減至二十一席，唔見逾八成；但三百萬選民之中依然有一百二十萬人投票畀保皇黨。係「強烈政治化氣氛下」，仲有四成人支持咁話。呢「四成支持者」，點解唔係各點票站開彩一刻一擁而上，為「反中亂港」黃絲當選而喝倒彩？點解唔去保皇黨議員辦事處拉banner，為落選候選人高叫「雖敗猶榮」？莫非，沒有海馬牌枕頭、沒有乜乜福利會福袋、沒有旅遊巴專車接送，保皇黨果班忠實支持者（中國用語：鐵粉）就返晒老人院、大灣區，唔出黎撐啦？
保皇黨人選舉落敗，有街坊開香檳贈興都唔係第一次既事， 副主席劉江華（現任民政事務局局長）、資深黨員鍾樹根、當年先後畀選民拉落馬，大家都齊歡唱、同慶賀（註二）。民主選舉，除左係選擇岩自己心水既政客、代表自己、為自己發聲；有時亦係一種表態，籍此踢走自己乞人憎既政棍落台。你輸，somehow亦代表你乞人憎。古有百姓燒炮仗趕「年獸」，今有市民落街歡呼送瘟神。見人仆街就最開心，尤其係衰人。
更何況，古語有云，「輸了選舉唔使怕，自有肥缺留江華」。中共來年為左保住出年立法會選舉，必定大撒幣、加大力度攏絡民心，蛇齋餅糭double up。到時一眾搞手撈油水都撈到手軟，曾鈺成使乜唔開心呢。
By the way，區選都過左一個禮拜，我都仲未見到有落選既保皇黨人落街謝票 ，連隔離邨果個做左十幾年既民建聯議員都唔見影。福字掛曆都無個，又點對得住咁多年街坊支持呀？
二、
自稱Marketing界KOL既徐緣（原名徐俊文），畀老婆係facebook踢爆偷食，老婆而家嚷著要離婚。疑似情婦曝光，原來係前落選港姐鍾溥敏（Mandy Chung）。本黎人地家事我不嬲無興趣八掛，不過呢條友表面好似道貌岸然，其實暗藏邋遢，行徑實在令人不齒。畀少少人物背景大家先，徐緣曾任壹傳媒集團Chief Marketing Officer，兼任蘋果日報副刊總編，後尾因為能力有限，令公司蝕大錢，被肥佬黎親自炒佢魷。之後佢自立門戶，由in-house marketing轉做廣告公司，自立門戶。無可否認，徐生好識得包裝自己，平時係facebook做personal branding做得好好，上位做廣告界KOL。令人覺自己係黃絲，其實佢係扮既：
- 舊年，徐緣間公司接左董建華「 團結香港基金」個job，搵埋劉德華，製作電視廣告，叫人贊成東大嶼人工島填海（註三）。
- 早兩個月又寫打手文，幫美心集團漂白，話太子女伍淑清唔代表公司。（西米亦有出文批評：〈【 工商管理學101】一間企業是屬於老闆？還是屬於員工？〉）
