Member-only story
保險朋友：保險好重要，唔係一個唔該，自己搞唔掂之餘仲搞到屋企人。拿，好似政府標靶藥，七皮野一個月，有個case個病人食左一年無晒錢，急掟樓再食，最慘係醫生無講幾時停喎！
我：食黎做咩，反正cancer都醫唔好架啦。何況，就算幫我買左危疾保險，都賠唔到咁多錢啦。
保險朋友：可以當慢性病咁醫，長食就得。有個客與癌共存，醫左300萬。另一個洗左450萬就好返晒。另外，危疾係用黎做生活費，買大個醫療保先用黎畀醫藥費。去延續生命！
我：保額有上限，個病人一開始無錢，選擇唔去醫仲好地地。你開左個頭，多數人既心理就係「唔好前功盡廢」，會格硬課金埋尾。本身留底後人一份心意，都會變成負擔。
保險朋友：2,500萬保額乜都夠啦。打到標把藥一年80萬，打足30年先2,400萬之嘛。你個年紀，保費都係八千幾一年之嘛。高端醫療呢幾年盛行呀。
我：你地D保險公司好多古惑野架喎，我可能三十年後先有需要claim，到時你地有咩招數搞到的我claim唔到，無仇報。
保險朋友：唔怕，賠唔到，D人就會周圍唱，上埋報紙。同埋我未見有問題囉！
我：到時咪好似早年力sell既101 plan咁，十幾年前聲稱每年回報起碼七厘八厘，又額外分紅又盛，做條靚數出黎引人買。好喇，保險公司見多人落搭，就走晒樣。到101 plan個朵衰左，無人信，就直頭sell過第二樣。
危疾保又係，魔鬼細節慢慢先浮出黎，條款多多，例如個腫瘤要擴散到50%先賠、49%都會唔賠。
保險公司搞臭product無所謂架，到時摺左個舊plan，又開另一款新產品之嘛。原先班客，who fucking care？保費都收左啦。
保險朋友：無人叫你做幾十年喎。
我：下？我今日買醫療plan，我預出年就生cancer？你無野下。
保險朋友：我個女claim一次十幾萬都等於二十年保費。呢個係安全網黎。
我：咪又係去返果句，我預我出年生野咩？同埋我問返你，2,500萬保額，三十年後，打到幾多次標靶藥？拿，你地保險經紀最鍾意講D唔講D，呢個亦係保險經紀最乞人憎既地方。
你會唔會同個客講：「拿，2,500萬保額，你而家生cancer，就可以打足三十年標靶藥。不過咁喎，如果你三十年後先生呢，計埋通張，到時可能只可以夠打兩年標靶藥喎。」
保險朋友：點解只夠打兩年咁少？
我：三十年前，沙田第一城賣20萬。而家，賣600萬。我當標靶藥無樓價升得咁快，升少一半，都會貴左15倍。到時2,500萬咪只夠打2年咁大把囉！
保險朋友：到時coverage唔夠，咪加大保障額囉！
我：岩呀，保險經紀最鍾意年年review，年年叫人加額，你又有生意做，又有多D佣收，你最想啦係咪？By the way，咪叉開話題先，你都未答我，你會唔會同個客講：「2,500萬保額，臨老可能只夠打兩年標靶藥咋。」我睇死你都唔會講架啦！
〈完〉
（以上內容全部屬實，如有雷同亦屬巧合。）
(2019–1–24)
傳送門：西米Go昔日文章2019
傳送門：【請不要在店內打嗝或者放屁】
