Member-only story
香港唔係美國，人地中頭獎會拎晒巨型支票，影晒相，上埋電視。香港中巨額六合彩又高調出黎既，印象中得幾年前上過生果報頭版既阿差（註）。一直以黎香港人都謹守「財不可露眼」既格言。
如果佢地怕揚左出黎，驚畀人打劫或者標參，我又覺得過慮啦。你估而家仲係肥肥、董標「富貴逼人」系列果個年代咩。今時今日，有幾千萬身家既人，彌敦道跌個招牌落黎都責死幾個啦。
你係新界鐵路沿線，求其搵間交通方便既村屋都七百幾萬一層、二千幾萬一幢。村入面大把原居民家庭，三代同堂，閒閒地有三個男丁，起三幢丁屋，身家咪六七千萬囉。
仲有，而家求其一條有人流既街，地鋪都下下過千萬。你諗下，港九新界咁多條街，每條街有咁多冧巴，手持市值半億地鋪既業主，肯定多過出黎佔中、佔旺既廢青。
我仲未計有幾個市區住宅單位收租既業主、一袋袋人民幣拎落黎既土豪、長期持有長實（1）、中電（2）、煤氣（3）、九龍倉（4）、匯豐（5）、港燈（6）既老股東、個個月係售樓處排晒隊要幫仔女上車既慈父慈母……
Come on，咪咁老土啦，時代唔同架啦，開心既事要同人share先會更開心架嘛，係咪？
p.s. 不過咁，有一日就算我中左頭獎都費事擺上ig，得果少少錢，費事講出黎畀人笑！
註：
〈昔日窮到冇飯開，今朝富貴逼人來，行運阿星買樓結婚〉，蘋果日報，2011–5–22
#中六合彩係精神既 #開心share
(2018–2–24)
傳送門：西米Go昔日文章
