Member-only story
對於大部份香港人黎講，拉丁美洲從來唔會係旅遊之選：無直航、萬萬聲既經濟客位機票、單程都要飛廿個鐘頭以上、有十二個鐘時差……已經好趕客。加上果度D國家，名聲真係好一般：窮、毒梟/罪犯橫行、官員貪污、國家賴債、治安差、個個都叫你入黑之後唔好出街。一句講曬，聽見都唔想去。
係呢片南美洲大陸，有個山區內陸國家叫玻利維亞。無錯，就係「天空之鏡」 （Salar de Uyuni）好出名果個。佢地個「萬年總統」Evo Morales岩岩就畀國民趕左落台。
壓倒駱駝最後一根稻草既幕後功臣，係當地軍方將領Williams Kaliman。當全國性大型反政府示威踏入第二十一日（11月9日），佢決定同總統割蓆，表明保持中立。因為「憲法不容軍隊與民為敵」咁話。翌日，仲上埋電視，公開呼籲總統辭職。
軍頭之所以肯押注國民果一邊，可以話係骨牌效益之下既結果。因為，玻利維亞既警察，比軍方更早倒戈。就係Kaliman表明中立同一日，首都La Paz既警察，已經率先撤離總統府同埋主要政府office。佢地與及其他主要城市既同僚，聯同國民一齊上街抗爭。與軍隊立場一樣，警方「與民同行，拒絕成為政治工具」。聽講，有警察仲分發催淚彈畀民眾，去驅趕親總統支持者添。
失去軍、警撐腰，加上國營電視台畀憤怒既國民攻佔，無得再做fake news同文宣，Morales總統自知大勢已去，唯有辭職落台。為怕被新政府清算，佢飛去墨西哥尋求政治庇護。
自10月20日，因為總統大選舞弊而爆發既示威；到11月10日Morales宣布落台，玻利維亞既逆權運動歷時二十二日完滿結束。人民雖然勝利，但有三位示威者不幸死亡。
其實，根據玻利維亞憲法，Morales已經做左兩屇總統，2019年係唔可以再連任。而2016年放寬總統連任限制既公投，國民都投票反對。只係Morales為左永續總統夢，走去憲法法院打官司，班法官裁決「阻止參選係有損其政治權利」，先畀佢今年第三次落場咁解。
明眼人都知，佢本黎係想做玻利維亞既獨裁者。Thanks God！
(2019–11–12)
