Member-only story
2018年夏天， 屯門有單倫常兇殺案。有個23歲女仔因為難忍長期嚴重濕疹，一直過著「唔係人過的生活」，父親節當日先用 刀手刃父母，然後吸氦氣自盡。佢生前係網上論壇留言：
「濕疹生仔仆街過窮人生仔……窮你都可以靠自己努力，濕疹，sorry，係一世都要suffer無得改變！」
其實，我覺得，都係窮之過。以下，我都分享朋友既親身經歷：
多年前，我朋友阿樂被派去一個空氣污染極嚴重既中國城市公幹，一落機唔夠半日就誘發濕疹（係佢咁大個人第一次生濕疹），仲要係極嚴重果隻。初時佢以為內陸地方導致皮膚乾燥，搽晒保濕/潤膚野都無效，後尾先知大獲。
佢逗留中國果幾個月，每日二十四小時，每一秒鐘都周身痕，好似萬千隻蟻咬咁。尤其以大脾內側、手瓜內側呢D「陰肉位」最嚴重。皮膚敏感到一個地步係衫褲磨擦到、沖涼有水經過，就好似輕輕搔癢，搞到忍唔住要𢯎，一 𢯎就損，一損就唔識得好返。就算你唔𢯎，沖涼都會沖甩表皮。唔使半個月，全身無一忽好肉。佢係當地入過醫院、打過針、食過中西藥、搽過類固醇藥膏（你知中國D類固醇真係落足料架嘛）……全部無效。無時無刻既「痕」根本無可能專心工作，亦訓唔到覺。
四個字：「生不如死！」
期間放假返黎香港，濕疹情況大有改善，落機唔夠一個鐘，就自然唔會再痕、皮膚慢慢好返。但放完幾日假，飛返上去，即刻翻發。阿樂最後頂唔順，幾個月後辭工唔撈。自此之後，皮膚差晒，就算係香港，一到冬天，天氣乾燥，濕疹就反覆翻發。
香港本身人多車多，污染已經嚴重，仲深受中國吹過黎既「霧霾」/「煙霞」（無論政府點叫都好，咪又係PM 2.5污染物！）侵襲！住係呢度，只會令到本身受濕疹問題困擾既病人，病情更加嚴重。如果佢父母有錢，可以送佢去乾淨、低污染既外國地方生活。病情好大機會大大改善。
仲有，係外國，國民有皮膚過敏，當地醫院係會同你做testing，幫你搵出致敏原係咩，等你有所防範。香港？公立醫院採你都有味。我問過政府診所，醫生直頭話「無呢d 測試」，佢地淨係識得畀大大樽既類固醇（因為平，有副作用？會藥物依賴？理得你！），連抗敏藥都唔想畀。
23歲少女，花樣年華。愛注重外表，係人之常情。逼到佢行到要殺人呢一步，雖唔可以簡簡單單話「濕疹」就係唯一動機，但肯定會係怨恨既一大來源。
我無意為誰開脫。我只會話，每日打開報紙，家庭問題往往都係錢銀問題。我深信，如果佢屋企有錢，「辦法就會比問題多」，到時，個結局就唔會係咁。
伸延閱讀：
〈女疑兇曾網上洩忿 怨濕疹生仔比窮人更差〉，蘋果日報，2018–6–19
(2018–6–19)
傳送門：西米Go昔日文章2019
傳送門：【必應已死】
