Member-only story
中原地產主席施永青，於旗下免費報紙am730寫既〈C觀點〉，係我最喜愛報紙專欄之一。施老闆呢種乘著房地產大泡沫而上岸既愛國愛黨商人，諗野堅離地得黎，總帶著十二分厚顏同無恥，其觀點永遠都咁趣味盎然。例如，前幾日果篇〈為香港的下一代擔心〉咁（註一）……
與（做投行的）朋友談起，他說他很為香港年輕人擔心，因為他們的同業近年已甚少聘用香港人。一個原因是他們在試用期間缺乏突出的表現，另一個原因是他們知道做投行很辛苦，而且競爭激烈，所以不想去接受挑戰。以至近年來應聘的本地新一代也少了。
投資銀行從來都係富二代、官二代既搖籃。有名有姓既城中權貴下一代，畢業之後第一份工十居其九都揀投資銀行，仲要係外資果隻。佢地之所以肯去做associate，美其名叫學野，其實只是幫CV鍍金。對於衣食無憂既二世祖黎講，呢份工既辛苦，人工又唔係高，所以無一個做得長。兩三年後，就會做回自己，各自返去家族企業幫daddy手，做其太子爺/太子女去。
點解呢班人唔係特別叻，亦無心係度長做，投行都照聘用呢？我唔直接答你，用例子答：
- 方方，十二屆全國政協委員、前摩根大通亞洲區副主席、中國區董事總經理兼CEO。2014年被廉政公署調查，涉嫌代表摩根大通不當聘用中國政府官員子女獲得生意，調查後並未立案。2017年，就Sons and Daughters Hiring Program（註二），美國聯儲局對摩根大通兩名前高層作出處罰，終身禁止佢地從事銀行業。方方係其中一個，並要繳交100萬美元罰款。
- 梁嘉彰，摩根大通證券董事總經理。2019年5月遭廉政公署落案起訴，指佢涉嫌賄賂嘉里物流主席洪敬南，聘請主席個仔洪任毅於該行任職，以換取嘉里物流IPO「優待」該行（註三）。
於「識人好過識字」既職場，以上例子只係冰山一角。自十幾年前中國富起來開始，投資銀行既生意越黎越依靠中國，佢地亦越請越多普通話人。原因只有一個，guanxi而已。
朋友說，他工作的商業大廈，進駐了多間外資銀行，平時在電梯裏碰口碰面的都是講普通話的人，香港人已愈來愈少。……近年上位的，都是經過競爭考驗的。
做服務業既，D客邊度黎，咪請返邊度人去serve佢囉，同聲同氣嘛。美國警局，夠編排華人係唐人街當差；中西部原住民地區，夠請返印第安人做sheriff啦。唔通憑此，你就話白人唔夠競爭力，做唔掂警察咩。
香港的年輕人……上進心卻大不如前。朋友說，他入行時，很樂意加班，因為加班可以顯示公司在用他，他會盡量做好工作去證明公司並沒有用錯他。但近年，一過了四點半，他已不敢發放工作給香港人去做。他曾被下屬提點，不要這麼遲才發放工作給他做，他不敢保證工作一定可以在當天完成。有些人即使沒有口出怨言，但亦會面有難色。那他很自然會找一些願意加班的人來安排工作。將來誰有機會升職，答案已寫在牆上。
