Member-only story
中國政權要洗腦，統一口徑，要求佢控制、佢影響之下既傳媒用「標準」用詞造句去寫新聞（註一）。同一評審標準，亦準備套用係2019年出版既高中歷史教科書度。其中以下四句，被評為「措辭不恰當」：
1.「香港位於中國南方」
教育局長楊潤雄話呢句意思可以係「中國境外的南方」，令人誤會。
2. 「中國收回香港」、
3.「香港主權移交中國內地」、
4. 「中國堅持收回香港主權」
楊局長話中國一直擁有香港主權，所以教科書不應該講「主權移交」或者「收回主權」（註二）。之但係，鄧小平當年明明對英國戴卓爾夫人講過：「如果中國在1997年，也就是中華人民共和國成立四十八年後還不把香港收回，任何一個中國領導人和政府都不能向中國人民交代」。唔通係主權誰屬呢D大是大非既問題上，楊局長呢D地方官員，比鄧小平更清楚中共既立場？
所謂明槍易擋，暗箭難防。今日就話有傳媒踢爆政府為左政治意識形態插手出版/新聞自由啫，其他做緊又未揭露出黎既真係唔知有幾多。大家見到文匯、大公、東方、明報、TVB……呢類公認親中既傳媒，就話自動啟動過濾mode識得隔一隔渣先吸收。你唔知本地剩餘極少數，睇落仲係中立既傳媒老細，幾時抵受唔住誘惑、或者壓力，走去跟隨官方路線。你更加唔知，果堆新晉傳媒，幕後金主其實係邊個。
就算無老細指示，你又唔知篇稿係咪有自細就洗晒腦既中國留學生、新移民執筆。（英文報道仲可以憑採訪記者既英文拼音，粗略分辨係中國人定香港人。中國人既英文名，特別多XYZ。）人所共知，香港地做記者，錢途麻麻、工時又長、行業唔算吸引。有人肯黎做已經好好，公司都唔要求得咁多。
身為讀者，唯一可以做既，就係要時刻警惕，保持critical thinking，提防中國政府無孔不入既洗腦工程。
你可能會話，睇新聞啫，使唔使做到好似防寶藥黨、電話騙案咁呀。無計啦，鬼叫「中國收回香港」咩！
註：
- 〈 歷史教科書評審內容要商榷？〉，有線電視節目〈新聞刺針〉，2018–4–17
2. 〈「中國收回香港」過不了教科書審查，AO楊潤雄難救教育亂局〉，香港01，2018–4–23
(2018–4–18)
傳送門：西米Go昔日文章
