Member-only story
呢排翻睇三年前套港產片《樹大招風》（註一），諗起舊年尖沙咀海港城太子珠寶鐘錶行有單劫案，警方用左四日就偵破。當日蒙面劫匪，就係八十年代被喻為「香港開埠以來最危險的械劫集團首腦」，四年前提早出冊既何東成（60）（註二）。
呢位阿伯坐左二十一年監，肯定無睇過《樹大招風》，所以呢，仲念念不忘當年食大茶飯既風光。今時今日仲走去打劫珠寶金行咁old school，唔係呀？五球港紙賊贓，黑市價值兩球（套戲講既），今鋪仲要三個人分。為左六十幾萬冒咁大既險，值咩？
不過又難怪，香港地搵食係艱難。一個同時代脫節二十年既阿伯，仲要有案底，連單幢樓既看更都做唔成。就算佢肯走去做清潔，咁既年紀，都只會搵到判上判判上既工。其他體力勞動工種，sorry，又無能力做。最多，咪幫茶記送下外賣，收三十幾蚊一個鐘既最低工資。轉做正行既路，佢無得行。
叫何伯去拎綜援咩？佢又無係中國娶個後生老婆，生返幾件，齊齊落黎住公屋，食福利。單身人士有排都上唔到樓，果d長者屋/籠屋，又要同陌生人逼埋一齊住，以何伯既過去同性格，遲早有命案。得佢自己一個拎長者綜援，加埋生果金，租間劏房都無左大半，淨底果少少，餓唔死既，粗茶淡飯囉。
可能，對於何伯黎講，重操故業先係最「理性既選擇」。以前食開大茶飯，唔通今日走去做埋偷呃拐騙呢d下欄野咩，邊過到自己果關？打劫珠寶店衰左，大不了咪入返去坐，之前踎左二十年，習慣晒啦！何況佢咁既年紀，入面班阿sir同囚友都唔會點為難佢架啦。輕輕鬆鬆摺下衫又一day，生活唔差得過係出面涯，起碼，監倉size都大過劏房呀，係咪！
註：
- 《樹大招風》榮獲第36屆香港電影金像獎最佳電影、最佳導演、最佳編劇、最佳男主角、最佳剪接五個獎。
2. 〈極度悍匪落網涉近20宗械劫17次判囚終身〉，HKET，2018–5–30
(2018–5–30)
傳送門：西米Go昔日文章2019
