Member-only story
成日都話香港九七主權移交之後「人心未歸」，好多香港人都唔認自己係中國人。尤其係班廢青，一個二個都唔係想歸英寧願做返殖民地，就係搞港獨，佢地有中國呢個娘親都唔認，實在大逆不道。
歸根究底，咪係一眾愛國愛港高官/權貴無以身作則之過囉！佢地呢頭力sell港青要愛中國（例子太多，不能一一盡錄）（註一）；果頭冚家都keep住本外國護照（如林鄭月娥，一家都係英籍）。呢種口裡說不，身體卻很誠實既行徑，大家看在眼裡，自然言者『諄諄』，聽者藐藐。做成咁多年使咁多錢去愛國教育，仍然成效不彰。
梁振英卸任特首，榮升國家領導人之後，全力愛國，把握每個機會表達愛國情懷。一時話自己全家都無英文名（註二）；一時又話著華服好過著西裝打呔（註三）。一副擔正大旗，走在愛國最前線既樣。拿，計我話，應該行多幾步，好似王永平提議（註四）咁：
「由梁副主席主持一個愛國誓師大會，會上一眾愛國港人宣布自己及子女都沒有或已放棄外國護照或居留權。這會是一場震撼人心的愛國行動，必定令無數港青心悅誠服，從此心無旁騖，只愛一國。」
Yeah！香港人睇人仆街就至開心既。唔知你地班權貴，夠唔夠膽跟？
不過咁喎，就算本地愛國愛港人士夠膽跟，梁振英呢個花樽國家領導人都唔夠膽帶頭做！點解？如果佢帶起權貴全家剪外國護照既風氣，佢上面果堆真正國家領導人點算？你知啦，中國出名個個都係裸官架嘛！
#689 #口裡說不身體卻很誠實 #愛國愛港
註：
1.〈馬時亨倡港青大灣區置業 往香港上班〉，經濟一週，2018–5–2
2.〈梁振英：三子女不必有外國護照 他們的未來不必有英文名〉，立場新聞，2018–4–19
3.〈穿「華服」出席華服節 梁振英：正裝不一定是西裝加領帶〉，立場新聞，2018–4–7
4. 〈梁振英示範如何鼓勵港青愛國〉，am730，2018–5–2
(2018–5–3)
傳送門：西米Go昔日文章2019
