Member-only story
報紙報道，有個退休公務員吳國樑（70）報稱兩個仔瞞住佢，賣走維景灣畔單位。佢入稟同兩個仔爭家產。吳伯又上報紙又上電視，數臭兩個仔嗜財如命，老竇都唔認咁話。
我地重組一下案情先：
2005年：吳伯一家四口搬入將軍澳公屋「健明邨」。
2010年：遷往同區居屋「彩明苑」。
2009年（買居屋前一年）：吳伯出資買入調景嶺「維景灣畔」，以兩兒子吳宇軒（35）和吳宇光（33）名義持有。佢講明二人只係掛名業主，要求佢地各自畀5,500元家用，當做交租同膳食費。
2016年：以吳伯老婆名義買入將軍澳「海天晉」。（2017年吳太過身，依遺囑由兩個仔繼承。）
2016年：以細仔吳宇光名義買入另一間將軍澳「海天晉」。
短短十一年，吳氏一家公屋換居屋、居屋換私樓、仲要一間變三間。係咪好勵志，好有獅子山精神呢！但你細心睇返，吳伯呢個置業階梯，其實每一步都走緊灰色地帶，甚至不惜犯法而黎：
1. 九十年代中，吳伯已經有錢買九龍塘「雅麗苑」同「又一居」。十年之後，點解又會過到資產審查，符合資格申請公屋？佢退休前做公務員，係鐵飯碗，理論上唔會無啦啦由買得起九龍塘私樓淪落到夠資格申請公屋架喎！其中，係咪有咩財技做左呢？
2. 為左綠表居屋同私樓兩兼得，佢抽居屋前，利用兩個仔既名買私樓。為左成功上會，佢地一家三口特登考的士牌，齊齊虛報職業係的士司機，話月入近三萬，成功呃到銀行批按揭。
3. 為左避交第二層樓既額外買家印花稅，吳伯分別利用老婆同細仔做人頭，買兩層私樓。
做阿爸既，咁多年黎以身作則，示範點樣「合法地」投資物業賺取最大利潤。而家，兩個仔「合法地」出售佢地自己名下物業獲利，又有咩問題呢？三父子同樣貪錢，唔使驗DNA都知真係一家人。今日，吳伯見到兩個仔盡得自己真傳，賺錢技倆青出於藍，應該老懷安慰至係咯，怨乜野呢！
#爭產
伸延閱讀：
〈父控子賣樓換鎖無情無義 兒子剖白：是爸爸貪婪〉，HKET，2018–7–16
(2018–7–14)
傳送門：西米Go昔日文章2019
