Member-only story
「公司話收6點，不過，除左第一日，之後從來無試過。」
by 白領，陳先生（化名）
「加班」呢樣野，好似係亞洲職場特別嚴重，尤其係日本、南韓、香港、中國呢d階級觀念同服從性/奴性特別重既社會。大家試下食完晚飯，經過佢地既核心商業區，一幢二幢美輪美奐既甲級商廈永遠燈火通明。唔係因為企業唔怕交電費，鍾意長開燈，而係果個鐘數，仲有人未收工。藍領工人可能好少少；做白領既，有返工無收工係常態。
以前七八十年代，香港好景果陣，公司叫員工開OT係要畀雙工（過時過節call人返工有三工添！）；之後無咁好景，只得工半；跟住只計時薪；然後，要過左指定鐘數先起錶（例如八點後先計OT錢，六至八點就無錢收）；再之後，批幾多OT錢由上頭話事……總之，隨著時代進步，公司對於加班補水set既關卡越黎越多，老細就係揞實個荷包，唔想畀錢。
最後，九七年既亞洲金融風暴，經濟差，畀大大個籍口老細，要大家共渡時艱（呢句野真係難聽過粗口，佢發達果陣又唔見共享富貴），九成九私人公司連僅有既福利 — 超時補水 — 都cut埋。
果幾年，又科網泡沫爆破，又沙士，裁員滾滾，人心惶惶。缺乏競爭力、出面無market既員工，唯一可以做既，係自動波加時去證明自己存在價值。拿！華人係一個鍾意頂爛市既民族：我見你係公司夜一夜都唔走，係老細面前揖揖揚揚；我自然唔執輸，有理無理都留係office揼波鐘。好快，個個有樣學樣，齊齊扮忙，由鬥夜走，到鬥遲出電郵/出whatsapp， 啱晒果班愛貪小便宜既華人老細合尺(讀「河車」）。佢地最鍾意就係員工「唔計較」、「唔怕蝕底」、有「獅子山精神」架嘛。有人免費幫你做野，梗係食得唔好晒，無任歡迎啦。
就係咁，港豬自此寵壞呢班重量不重質既老細。基於劣幣驅逐良幣法則，不論大中小公司，間間都老奉叫人無償加班。其後進化為「邊個準時走，邊個就係無野做」既辦公室文化，唔OT既就係冗員，炒得。
呢個係港豬既共業。
#收買人命 #做死人咩
(2019–4–15)
傳送門：西米Go昔日文章2019
