Member-only story
表面係民企，其實有中國軍方背景既科技公司「華為」，其創辦人任正非個大女孟晚舟（跟母姓）前幾日出事。畀加拿大政府拉左。法庭文件爆料，話佢最少同時有四本中國護照及三本香港特區護照（註）。
香港人本黎食住花生，遠距離欣賞美中兩大國打MMA。而家紛紛關心孟小姐點解/點樣可以手持三本有效特區護照。拿，正常人一個名，同時申請咁多本同一個國家簽發既護照把鬼咩。以我多年睇戲經驗，只有罪犯同特務，先有需要用假身份方便做野。任正非貴為中國數一數二成功商人，公司如日方中，有錢有面，近排又唔覺有權鬥新聞，佢一家人應該就無著草需要喇。唔通，華為太子女其實係特務，國家有任務畀佢，叫佢跟伊朗條線？
定係，班中國土豪平日係鍾意開定多幾個分身account，純粹方便自己落黎香港搵jetso？例如，係香港，每人有一次首次置業權利，班土豪咁鍾意走資買樓，仲要下下億億聲，逐個分身買，可以慳返唔少辣招稅。又例如，一個身份可以投一次票，地區直選就話有一百幾十萬選民，要贏就要靠運送一車車老人院耆英。功能組別果d，好多只得一千幾百個選民之嘛，一人如果可以手持幾張選票，都幾有影響力架。另外，第時班土豪老左，拎生果金呀、政府派錢呀、認購iPhone/Silver bond呀、醫療券呀、乜乜物物福利又可以拎多幾份。大家唔好笑，中國人最鍾意就係貪小便宜。前排有馬拉松賽事，班中國跑手寧願負重，都要一路跑，一路沿途掃晒補給站既energy bar，塞入褲頭、襪頭，拎返屋企食。你話，有jetso佢地點會唔要？
Anyway，已經有記者問香港政府，點解有人可以同時擁有三本特區護照。林鄭月娥呢，就唔答走左去。入境處就話「個別事件不作評論」。
Well，唔知幾時開始，呢句野取代「No comment」，做左官僚系統回應公眾提問首選萬能key。我都唔明，點解「個別事件」會係「不作評論」既合理理由既？乜唔係正正因為果個係個別事件，情況特殊，與一般case唔同，大眾先更加有討論價值、政府先更有需要交代咩？非個別既general case，使鬼你解釋咩，我自己上google問Siri都搵到答案啦。
面對住一個無諗過向市民負責既政府，我地要知孟晚舟點解/點樣有幾個身份，唯有靜待外國勢力美國加拿大爆多d料。
#華為太子女 #有特權 #等睇戲
註：
〈U.S. Department of Justice letter regarding Meng Wanzhou〉
(2018–12–10)
傳送門：西米Go昔日文章
