Member-only story
(注意:以下資料只供參考,不保證完全正確,如有疑問請向德國大使館、相關大學或所屬機構查詢)
當你準備好晒所有文件﹐包括去完德國領事館認證左影印本後﹐下一步,就係去uni-assist網上申請同埋寄文件。uni-assist作為一個中介﹐佢會幫大學檢查申請者所交的文件是否已經足夠並且會檢查所交的文件是否符合大學的要求﹐到最後佢會幫學生轉交文件比你所申請的每一間大學﹐所以整個申請只需要做一次就得。雖然uni-assist係一個非營利組織﹐但佢仍然要靠收入去維持服務﹐因此透過uni-assis係要收費。申請笫一間大學會收費七十五歐﹐之後每多一間就會收多三十五歐。但有時你所申請的大學會幫你比埋申請費﹐咁你就唔使再比。
(呢度,有人會問,點解要畀錢中介代辦申請,而唔自己直接向學校deal呢?原因就係,有部份大學只接受uni-assist作為唯一申請方法,唔接受你直接寄去畀佢地。)
係你上網申請好晒所有大學之後﹐uni-assist就會列出你需要比的金額﹐你可以網上電匯﹐又或者用信用卡。用信用卡的話就要係uni-assist下載授權書(連結: https://www.uni-assist.de/fileadmin/Downloads/Tools/credit_card_payment_form.pdf)﹐填好後就連同要寄的文件一齊寄比uni-assist。
當你已經係網上upload晒所有文件﹐已經電匯左申請費又或者填好信用卡授權書後﹐咁你就可以去寄信。可能去到呢到﹐你會問點解寄信都要講﹐因為要留意的係就算你已經係網上填好晒﹐uni-assist都唔會處理你的申請﹐直到你的文件送到uni-assist並且比左錢﹐咁佢先至會開始處理你的申請。而且更重要的係每間大學都會有各自的截止日期﹐呢個日期係指你封信正式到達uni-assist的日子。如果用平郵由香港寄去德國﹐起碼超過一個禮拜﹐而且仲未計算你封信有機會係德國海關扣查。再者會有機會中途唔見左﹐咁你的申請就會白廢。因此﹐我係呢到建議大家用香港郵政的特快速遞SpeedPost﹐因為不但可以以最快速的方法送到uni-assist外﹐你仲可以check到封信到左uni-assist未。萬一真係唔好彩唔見左你都仲可以即時寄過一封。可能你又會問點解唔用其他的速遞公司﹐例如DHL﹐咁係因為一黎SpeedPost平過DHL好多﹐SpeedPost一公斤只需267蚊而DHL要416蚊﹐二黎SpeedPost同DHL都係保證第二個工作日送到﹐三黎份文件到左德國後都係比番DHL派遞。
當uni-assist係限期前收到你的文件後佢會出番封email話你知﹐呢個時候你就可以等。等咩﹐就係等uni-assist會唔會話你的文件並未符合大學的要求﹐如果係咁的話你就要再寄過(所以點解早申請有著數﹐有咩事都可以趕得切補交)。如果uni-assist檢查後認為滿足晒大學要求﹐咁佢就會email通知﹐會將你的申請轉交比大學。呢個時候uni-assist的任務就完成﹐之後所有問題都係直接同大學聯繫。
去到呢到﹐就到左最辛苦的一步﹐等大學的消息。
p.s. 當你係網上成功申請大學﹐其實就已經可以同時申請埋間大學的宿舍(係呀﹐兩者係分開﹐有大學學位唔等於有宿舍)。好多時申請都要排幾個月﹐所以申請定就最好不過。不過申請情況就間間唔同﹐詳情自己睇番大學資料。
(2018–4–20)
傳送門:西米Go昔日文章
傳送門:80後出走德國去讀書系列