【我得，你都得！】佢年過60，一樣日做十幾個鐘自力更生

由下個月開始，合資格申請長者綜援年齡會由60歲提高至65歲（註一）。社會福利署既理由係「香港越來越多長者可以繼續工作」，既然可以工作，就應該繼續工作。各界都話政府為左慳錢、不近人情。現年61歲既特首林鄭月娥就解畫，以佢自己為例：「我都超過60歲，今日仲係每日10多個鐘頭咁做嘢。」（註二）仲話特首份工辛苦，但佢做得輕鬆。

首先，佢作為行政長官，月薪三十七萬，係三千幾蚊既長者綜援金100倍。我地打份工既，都係睇錢份上，咩為興趣、有使命、服務市民都係呃細路既啫。好似佢份工咁：日薪萬二三、另加立立雜雜津貼、免費車連司機、G4保鑣、家廚、一堆工人、僱主提供埋二萬四千平方米（唔係尺）巨宅、佔地二點三公頃別墅……堅係荀工，香港地大把人𦧲飯應，做到死都制。

你試下叫林鄭玩下《窮富翁大作戰》吖！推十個鐘紙皮、洗十個鐘廁所、渣十個鐘頭巴士、做十個鐘地盤……睇下仲係咪咁口響，話「做得輕鬆」，做多幾年先退休都無問題？

大佬，去得拎得綜援都係社會上最底層--除左班中國新移民，明明大把田地房產收租，但有心隱瞞落黎呃香港福利--佢地十居其九，都係做緊最低下、最辛苦既工作。你仲格硬叫人做多幾年，唔畀人退休，係咪痴線架。林鄭佢自己61歲都得，就等於其他人都得？搵自己咁exceptional case做例子，有無常識架！班富二代夠輕鬆買到樓啦，係咪就代表香港無房屋問題呢？

用返佢個邏輯，馬來西亞總理Mahathit係咪都要提高國民拎老人福利既年齡到95歲呢？無經過民主選舉既特首，區都唔使落，八達通都唔識用，諗野離晒地，照樣大大聲自跨「同社會無脫節」（註三）。人做官佢做官，佢咩都唔使向市民交待之餘，仲可以up得就up完全無任何後果。

話分兩頭，班老野成日話班後生仔唔捱得，而家係時候俾佢地表演下有幾捱得喇！

#難聽過粗口 #唔捱得

註：

1. 〈 今年二月起調高社會保障金額及把領取長者綜援合資格年齡由60歲改為65歲〉，香港政府新聞公佈，2019–1–7
2. 〈自言逾60歲仍日做十多小時〉，信報，2019–1–9
3. 〈否認是離地 林鄭月娥：沒有和社會脫節〉，獨立媒體，2017–1–29

(2019–1–11)

傳送門：西米Go短評 #001–100，#101–200，#201–300