Member-only story
跟據巴士公司招聘全職司機既廣告：
二十幾年前，中巴請人月薪$15,000（註一）；今日，九巴請人月薪$20,000（註二）。
=> 呢二十幾年黎巴士司機人工升幅達33%。
同期，香港甲類消費物價指數，由1997年至2017年，升幅39%（註三）。即係話平均黎講，當年$100買到既野，今日要用$139先買得到。
數字上，巴士司機薪酬，只係跑輸通脹幾巴先。但眾所周知，通脹數據只係數字遊戲，你同我真正感受到既民生物價加幅，遠遠唔止咁少。點解？拿，基層市民，生活離唔開「衣食住行」呢幾瓣。
「衣」，因為外國fast fashion同淘寶既興起，消費者受惠於全球化競爭，令到見得下人既衫褲鞋襪都唔敢點加價。「行」，因為大部份公共交通工具受政府規管，例如火車地鐵有「可加可減機制」、專營巴士小巴要行政會議通過，所以票價加幅大致上與通脹持平。之但係，其餘「住」同「食」兩項，大家感受到既加幅又點止咁少？
「住」，我都唔講呢二十年黎，細價樓、公屋、居屋呢類上車盤既尺價唔知升左幾多倍。就算租樓既，同一份租金，以前住到四五百尺私樓單位，而家只可以勉強搵返同區既唐樓百零尺劏房。
「食」，打工仔普遍工時長，一日有三餐出街食好閒。我問下大家，茶餐廳、快餐店呢類平民食肆既價錢，近二十年又止唔止加四成咁少呢？食物貴左之餘，份量同時縮水、用料仲差左添！之前，西米先引述一篇生果報文章（註四），話大家樂既焗豬扒飯咁多年黎加左一倍，個作者已經話姓羅既老細係好克制，好有良心。可以想像其它無咁有良心既食肆老闆，情況會係點。
查實自從香港九七主權移交以黎，計及物價升幅之後，人工越黎越低既情況，都唔關你細個有無讀書事。政府實行學位量化寬鬆政策，大學畢業生無論起薪、定做左十年八載，人工比起當年都差好遠。服務性行業好似空姐呢類都一樣越請越平。
呢二十年黎，除左因為大量中國人湧落黎而受惠既工種，例如：靠食佣既名店、金鋪、化妝品、電器、地產sales、醫生護士；食正潮流既行業，如基建、部份IT工種，同埋公務員之外。香港近四百萬就業人口，有邊個覺得今日生活好過二十年前呢又？
註一：
註二：
註三：
註四：
〈【一隻沒有味覺的港豬】原來劣食集團「大家樂」，都有打手吹奏！〉
(2018–5–1)
傳送門：西米Go昔日文章2019
