Member-only story
首先，我地重溫一下歷史，睇睇咩叫「大躍進」先：
「大躍進是於1958年至1960年，在中國共產黨領導下，試圖利用本土充裕勞動力和群眾熱情在工業和農業上不切實際地增產的社會主義建設運動。」
「毛澤東於1958年提出超英趕美口號，鋼產量目標要15年超出英國及20年趕上美國。 鼓勵全國土法煉鋼。」（註一）
然後，我地睇下 貿易發展局呢個香港官方機構，主席羅康瑞係2018年一個創新年會噏乜野先（註二）：
1. 五年之後，粵港澳大灣區將超越世界上的三個大灣區；
2. 若果能夠發展到紐約的人均GDP，粵港澳大灣區就更厲害，與整個日本的GDP一樣。
中國將珠江三角州一帶地區重新包裝做「粵港澳大灣區」，好明顯就係向美國加州 The San Francisco Bay Area「致敬」架啦。不過，人地有矽谷、有一級名校 Stanford、有荷里活……。至於另一個世界出名既灣區，叫「東京首都圏」，唔使係度多介紹，大把香港人熟日本。睇返珠三角呢？除左叫肥媽sell人食鯇魚魚生同買樓（又係買樓！），仲有D咩賣點？真係有丁點吸引力，班中國人就唔會一車車落黎香港，全方位搶資源啦！
羅康瑞呢種出名廢既二世祖（點解話佢廢？你睇下佢伯爺留落黎既瑞安/鷹君地產，近二十年有咩發展？佢個人黎講，除左娶霍震霆50歲既前妻朱玲玲，仲有咩新聞？），我地都唔期望佢有咩真知灼見架喇，但都唔使無知（定無恥）到「五年內超美趕日」都噏得出下話。
估唔到今時今日，仲有人宣揚「人有多大膽，地有多大產」呢D浮誇毛澤東思維，仲要係以香港對外貿易既官方機構主席身份講，真係好鬼羞家。
By the way，呢個「亞布力青年論壇第四屆創新年會」本身都好chinese架啦。主辦單位要求到場採訪的記者簽署「報道聲明」，訂明傳媒發布任何形式報道，需先經主辦單位審核；視像或文字直播如遇嘉賓發表不適合對外公開的言論，傳媒需協助論壇作出修改、刪除。
做法同中共只准用官方新聞稿一樣。呢度香港黎架喎。
註：
- 〈大躍進〉，維基百科
- 〈羅康瑞：5年內粵港澳大灣區超紐約東京〉，蘋果日報，2018–6–23
(2018–6–23)
傳送門：西米Go昔日文章2019
