Member-only story
上回講到，坊間出現一本〈保安天書〉，教人點樣做好「看更」呢份工。作者凌sir話，無論係想應徵既有志之士，抑或現職做緊既實Q，都應該要裝備自己，要有「警察」既質素。
但係，我作為一個非豪宅業主，就唔敢認同凌sir既觀點喇。
點解？若果將「保安員」提升到「警察」既層次，咁你同我屋企樓下，果幾個鄉音未改既阿姐、行樓梯都索氣既伯伯，咪全部無得留底，要換過晒新畢業毅進仔至得？看更年輕化我無所謂呀，但到時一定無可能繼續畀最低工資三十四個半。按照警員薪酬標準，起薪都要兩萬三千喎，私營公司就算畀唔足，打個八折，都要一萬八千蚊。仲要將而家一日兩更，日做十二個鐘制度，變成一日三更。本身請開兩個既，將來要請多一個。屋苑管理費咪要加幾倍？唔使問，班業主一定唔會贊成，寧願將價就貨，請返班阿姐阿伯好過，反正佢地都係行行企企之嘛，你唔會預佢幫你追賊架啦。
另外，呢本天書一直強調「保安」同「警察」肩負既工作「大致一樣」。既然兩者職能相同，係香港呢個自由勞工市場，人工應該差唔多至係。但好明顯而家班差佬overpaid好多喎！你可能話，香港政府一直奉行高薪養廉政策：公職人員有優厚待遇，以換取佢地唔會以權謀私、唔會貪污受賄、秉公辦事。但係，呢D錢好似白使左落警隊度喇。近年本地網民戲稱警隊係「全港最大犯罪集團」並非無的放矢。休班警/當更警時不時涉及各式罪行而見報，非禮、強姦、偷窺、盜竊、醉駕，落格、傷人樣樣做齊（註一）。佢地「薪」就高喇，「廉」？睇過睇過……
反而，一班身處基層，農曆新年同你講早晨，平時釣魚恰眼訓既保安員，我地有幾可聽到佢地會犯事呢？
By the way，呢本〈保安天書〉有個chapter，介紹一個event（活動）入面既保安工作。作者以十年前，藝人陳冠希回應閃卡事件既記者招待會做例子。原文佢用「淫賤希記者會啟示」做標題（見第八十三頁）。
Well，點做好保安呢份工我唔識。我淨係對凌sir起個咁eyecatching既標題有意見：兩個未婚成年男女，係你情我願、神智清醒既情況下，閂埋房門自拍人體寫真，有幾「淫賤」呢又？講「淫賤」，夠早前果個男警員，聲稱為左搜集證據，去足五次酒吧放蛇，次次玩足三四個鐘，同賣淫囡囡大玩「揸波game」淫賤（註二）？
#千萬不要google搜尋休班警
註：
- 〈有種罪犯叫休班警察〉， 熱血時報，2017
- 〈法庭：酒吧泰妹「揸波Game」警五度放蛇惹質疑〉，東方日報，2019–1–30
(2019–3–11)
傳送門：西米Go昔日文章2019
