Member-only story
一黎港人最實際、二黎商鋪租金貴，所以，香港既書局，擺得出黎賣既，十居其九都係實用性高、睇完即刻用得著既工具書。除左食譜、旅遊、運程、投資之外，原來教人「求職」既書都唔少。
我講緊果種，唔係教你點寫CV、點見工呢類old school大路野。而係針對特定行業/職位既求職攻略。AO、EO、各紀律部隊（警察、海關、消防）呢類薪高糧準超多人爭既政府荀工固然唔少得。空姐/空少、地勤、酒店、sale屎、銀行保險都一樣有。最估佢唔到既係，收緊最低工資、一日做足十二個鐘既「保安」，都照出專門雞精書教路架喎（註一）。咦？所謂「巡樓師」、「巡場師」，乜唔係有手有腳都請既咩？
Anyway，呢本書既作者叫「凌sir」，自稱當差二十八年，之前已經出過兩本雞精書教人投考警察。可能出版社食過翻尋味，今次叫佢教人點去做好「保安員」（a.k.a. 看更）呢份工。
本書第一章一開波就話：「保安員的素質應該與警員一樣，因為他們肩負的工作與警員大致一樣的，分別只是警員在公眾地方維持治安、保安員則在私人地方提供『私人安全保障 — Private Security』而已，歐美西方各國及日本更稱他們的服務為『私人警衛 — Private Policing』，責任重大。」（見第十二頁）
嘩！竟然將駐守我地屋企樓下既看更、商場/工商廈實Q，同林鄭特首外訪引以為傲既「金卡片」（i.e.香港警隊）睇齊（註二）。See？凌sir睇得幾咁通透，佢完全清楚香港警隊究竟係咩質素。唔係老差骨都無資格講呢D真話啦，係咪先！
p.s. But，sorry凌sir， 作為香港人， 我地應該講「質素」唔係「素質」囉唔該。
#搵食艱難 #打份狗屎垃圾工都要讀雞精書
註：
- 〈保安天書〉， 凌劍剛，2014
- 〈林鄭：警隊是推廣香港「金名片」〉，蘋果日報，2019–1–13
(2019–3–9)
傳送門：西米Go昔日文章2019
傳送門：【拿！香港警察呢，就係……】
