Member-only story
【教學】人在香港，如何轉錢到外國戶口？
好喇！大家睇左上兩篇教學文，應該已經按照自己需要，開左人生第一個外國（a.k.a.離岸）戶口。一個豬仔錢罌只係一個空殼，入面要有錢先有作用。銀行戶口都係一樣。今日就同大家101地講解下，點樣轉賬外幣去其他銀行：
一、香港銀行轉「人民幣」去另一間香港銀行
人民幣同港紙一樣，都可以經轉數快（FPS）轉賬，絕大部份本地銀行出錢同收錢都免費。你開人民幣支票都得，一樣免費既。
二、香港銀行轉「美元」、「歐羅」去另一間香港銀行
呢兩種貨幣可以經一個叫CHATS既銀行系統做本地結算。好多本地銀行只會收取低廉（e.g. 10蚊港紙）費用、有幾間大行（如HSBC同Citibank）仲要免費添。中小型銀行會收你貴D（e.g.富邦收$50），兼可能有中轉行費用（下面再講）。大家唔怕煩既亦可以拎現鈔存入去心儀銀行（太大銀碼可能有每日上限或有收費）。特登開個外幣支票戶口，開寫支票亦得，呢個肯定免費，幾大銀碼都無問題。
三、香港銀行轉「其他外幣」去另一間香港銀行
除非你拎現鈔再存入，其他外幣，包括香港人最關心既英鎊、加紙，一律需要以電匯（telegraphic transfer、TT）方式由一間銀行匯款去另一間銀行。手續費分為三部份：
1. 出款銀行匯出費
2. 中轉行手續費
3. 收款銀行匯入費
（1）同（3）可以在相關銀行收費表見到。
（2）首先講解下咩叫「中轉行」。當A銀行無係B銀行開結算戶口（i.e. 兩者無結算業務往來），就要搵另一間C銀行做中間人轉賬（A同C、C同B分別都有結算業務既）。如搵唔到共同既C銀行，就要再搵多間D銀行做第二間中轉行（A同C、C同D、D同B分別有結算業務）。C、D（甚至E、F……）銀行做得中間人，過河要濕腳，呢個就係中轉行手續費。唔好以為轉外幣去另一間香港既銀行好簡單，絕大部份情況係要先匯去果隻貨幣既國家，再由果個國家匯返黎香港。例如日圓，香港銀行A要先匯去日本某間銀行、然後由日本某間銀行匯返黎香港銀行B。
弔詭既係，作為一個普通個人客戶，你事先唔會知道筆錢要唔要搵C幫手、亦唔知C將會收你幾多錢。因為同樣係A去B，唔同貨幣走既路線都唔同；你做轉賬既時間唔同（例如截數前、後），筆錢要走既路線都可能唔同。路線全由A內部決定。分行職員只會懶係盡責咁溫馨提示你：「我地費用唔包中轉行收費。」當你再追問佢地有關「中轉行」事宜，答案九成九係：「呢個費用唔係我地銀行收，我地唔清楚blah blah blah」。
