Member-only story
西方文明國家，近百年以黎華人嚮往。稍具規模既城市，華人聚居，梗有條「唐人街」係度。大城市果D，唔止一條「街」，直頭係一個城區，警局、銀行、醫院、政府部門都派華人駐守。好多盲字都唔識多個既移民，可以一世人無講過外文、無踏出過唐人街，生活無礙。
近幾十年，外國都係左膠當道，佢地擁抱文化多元、大愛包容。（唔似得習近平，十二月唔畀中國人擺聖誕樹、扮聖誕老人、唱聖詩報佳音；四月唔畀有復活兔……總之要禁絕國內宣揚耶穌教節日。）各地政府係正月，於唐人街搞下活動，與民同樂-好似花車巡遊、嘉年華、舞龍舞獅-齊齊慶祝農曆年。一直以黎，洋人同香港人一樣，都叫呢個做「農曆新年」（Lunar New Year）。自從近二十年中國人富起來，大量土豪湧去外國買屋買地買護照，班簡體字人就爭「話語權」，企圖騎劫呢個節日，要當地人改口叫「中國新年」（Chinese New Year）。佢地又試過反對舞獅，話中國北方人無呢個傳統。後尾，仲想進一步正名做佢地先會叫既「春節」添！總之，就係一貫中國人作風，想獨占啦。
唔知係咪見到班中國人太椏柞霸道，有損左膠大愛包容價值觀。澳洲雪梨市政府今年就決定唔用「中國新年」，改返叫「農曆新年」。佢地話正月初一唔單止係中國人既節日，其他亞洲人都同樣慶祝，所以澳洲政府要顧及各國人感受咁話。
呢D時候例牌有中國人唔知醜，衝出黎柒。有澳洲傳媒就報道，當地「華人」對呢個改變抗議譴責，話雪梨政府對華人欠尊重、唔正視歷史、傷害中國人感情blah blah blah。咦？乜D口吻咁似中國外交部既？唔使審都知係中國新移民搞鬼啦。我地香港移民同一班老華僑，又點會有咁既「中國人感情」喎！
Anyway，今次左膠難得做左件好事，阻止中國霸權，要讚！
#雪梨不是悉尼 #LNY不是CNY
(2019–2–3)
伸延閱讀：
〈Sydney’s Chinese New Year festival renamed as Lunar Festival 〉，SBS，2019–2–1
傳送門：西米Go昔日文章2019
