Member-only story
作為一個香港土生土長既八十後，「溫拿樂隊」（The Wynners）紅果陣我未出世。溫拿散band，譚詠麟、鐘鎮濤走出黎各自發展果陣我仲好細個。如果唔係行街經過戲院，見到有套叫「兄弟班」既戲上緊畫，講真，係唔會醒起呢隊band。
套戲個故仔開宗明義以「溫拿是如何鍊成的」做藍本。「熱血青年追尋夢想」呢個theme無錯，但配上喇叭褲、煲頭、關刀領、加埋幾個六七十歲既阿伯，就好趕客。除左造形老土，最大問題黎自「溫拿」本身。
懷舊無問題，致敬都無問題。九十年代，有幾套「黑玫瑰」電影模仿陳寶珠、蕭芳芳；TVB亦拍過「難兄難弟」劇集扮呂奇、謝賢；李克勤都有翻唱譚炳文名曲「舊歡如夢」。都掀起過一陣懷舊六十年代風。當時，唔單止吸引到四、五十後既觀眾，仲成功開拓後生一輩既注意。除左演員做得好，仲因為被模仿既對象，形象夠鮮明凸出，夠代表性。
「溫拿」活躍係七十年代，同時期英文流行曲係香港極為興盛，由Carpenters、Peter Paul & Mary 既folk song，到Bee Gees、Boney M既disco music，到John Travolta既舞步，基本上係當時年青人潮流既指標。果個時期，成個Canton Pop都係模仿歐美，「溫拿」雖然係紅，但都唔例外。試問，今日年青人要懷舊，要認識七十年代既音樂既話，點解唔去追返潮流既源頭，而要睇一個造型同歌路都係抄人地既山寨貨？人地人才濟濟、變化多端、原創性豐富，各方面都比「溫拿」優勝。而家有萬能既Youtube，click幾下就輕易比較到。
仲有，「兄弟班」導演同編劇都係陳友。就係「精裝追女仔」、「殭屍先生」做詼諧角色果個陳友。就係1989年張曼玉拎金像影后果套「不脫襪的人」，既編、導、演。大佬呀，上面所講既電影，幾多十年前呀？離遠都聞到果陣濃濃既過期味道啦下話。
一個過氣導演，叫埋幾個過氣阿伯，演譯一個out到爆既劇本。拍出黎，只係齊齊緬懷昔日風光既打飛機之作。除非你係當年溫拿既忠實fans，仲有邊個會有興趣入場睇呢？
p.s. 條trailer不停loop「原來世界怎麼變，友好的心不損……」，我不期然諗起現實中，有兩個樂隊成員，當年因為爭做主角而失義、拆伙、散band。今日竟然講呢D，都咪話唔諷刺。
（2018–07–19）
傳送門：西米Go昔日文章
