Member-only story
面對香港持續不斷既逆權運動，林鄭同幕後操縱既政權花招盡出：由口講「戒嚴」、出「出解放軍」；到真係搵刀手斬人、隨意控告圍觀市民……目的只有一個 ，就係靠嚇。
呢幾日，佢地又放風，話要出動〈緊急法〉（註一）。類似條例，好多國家都有，通常叫「緊急狀態令」，人地係等到打仗、恐怖襲擊、N年一遇天災先用。我地車呔都唔見有燒過一條，就叫晒「緊急」喇，都唔知班高官驚乜野。Anyway，原因從來都唔重要，我地睇結果。結果就係，特首可以制定任何佢認為合乎公眾利益既法例。你無睇錯，係「任何」，即係乜都得，無限權力！到時林鄭市長只需啪一下手指，反中亂港既廢青又好、滯留本港既中國貪官土豪都好，瞬間拉人封艇兼抄家。Yeah！
咁屈機既招數，香港政府咁多年黎只用過兩次。上一次係「六七暴動」，詳情可以問返家中長輩，在此不贅。另一次呢，就要數到1922年，亦即係〈緊急情況規例條例〉出世果年。究竟當時香港發生咩事，要逼使殖民地政府要制定絕招呢？
答案就係：「海員大罷工」。
話說一九二二年一月二十二日，兩大英資船公司 — 渣甸同太古 — 又唔肯加人工畀華籍海員。（「又」，唔係第一次架喇！）國父孫中山先生有份成立既「海員工會」決定反檯，發動大罷工。為左鼓勵手停口停既手足參予，工會派錢。邊個願意「暫緩返工」既，就有生活津貼，逐日計。短短一個星期就有六千幾人參加。其他英資船公司海員、碼頭工人、煤炭工人不分化、不割蓆，相繼響應，罷工人數去到三萬幾。
連小學生都知，香港開埠以黎就係一個轉口港，轉口即係貿易。一百年前，對外貿易全靠海路。工人雖然揸住航運呢個「春袋」，癱瘓全港經濟；不過，當時英資洋行同殖民地政府都企到好硬，唔肯讓步。時任港督司徒拔決定「以武制亂」，落戒嚴令、查封「海員工會」、派英軍拆工會招牌（真係拆走塊招牌）。誰不知此舉刺激更多行業既工會加入，罷工人數飆到十幾萬。
要知道，1920年代香港人口只得六十幾萬，有超過兩成人（如果只計勞動人口唔止兩成）罷工係非常大件事。港府同船公司嘗試「搭建溝通平台」，透過中間人（e.g.東華醫院總理）同工人「對話」，不過失敗。佢地唯有一邊叫英軍揸天星小輪維持交通，一邊搵外勞維持市面。同一時間，工人將行動升級，阻止廣東運糧食黎香港。
呢班工人一窮二白，可以話 「have no stake in the society」，唔怕攬炒。亦唔似得白人同高等華人，要靠本地工商業維生。工人係香港無野撈，大不了去廣州搵食，再唔係返鄉下耕田。因此，政府下令停駛九廣鐵路，阻止工人搵後路。
果個年代，中華大地戰亂頻頻，穿州過省走難係家常便飯。無火車搭，就用腳行架啦。當人群途經沙田果陣，有個鬼佬警司開槍，呯呯呯，工人三死八傷。今鋪大鑊，連和理非都connect埋，民憤大爆發，局勢收唔到科。
