Member-only story
立場極度親中既前立法局主席，全國人大常委范徐麗泰，係今年2月卸下所有公職前，接受有線新聞訪問。當被問到從政咁多年，有無臨別贈言時表示：
「即使係對抗同你意見不同嘅人，佢都係一個人，都係值得你嘅尊重，唔好將佢哋『妖魔化』，因為當你哋『妖魔化』佢哋嘅時候，你自己都開始妖化」。
簡單黎講，同俗語所講：「一隻手指指向人，同時有四隻手指指向自己。」既意思相類似。亦即係小學生鬥咀常用既「話人者是」。
范太係中共喉舌，每逢香港有咩政治/基本法爭拗，佢同譚惠珠二人，必定上鏡為中共護航。好自然，呢句贈言既對象，係所有反共、疑中派（包括港獨、泛民、非建制、以至所有同中國打對台既外國政客）。「被妖魔化」既係中國政權。
可惜，中國政府咁多年黎，破壞人權法治、踐踏民主自由、做盡種種反文明、非人道之惡行，中外皆知。以西方文明標準，中共就係一頭妖魔。反對佢既人根本唔使抹黑、老屈、跨大，花時間去搞咩「妖魔化」。只需要簡簡單單道出事實，指黑為黑就足夠。既然反對派沒有「妖魔化」中共呢個「因」，范太口中既「同時自我妖化」呢個「果」就無從談起。
相反，「妖魔化」敵人先係中共一貫技倆。以前，同毛澤東唔岩咀型既，叫牛鬼蛇神、毒草、造反派。今時今日，唔聽中共話既，叫反中亂港、崇洋媚外、 阻住地球轉……
我地又日日都見到，包括范太在內既一眾建制派、愛字頭團體、親中傳媒、各級京官，如何缺乏邏輯反智又荒謬、如何罔顧事實信口雌黃。呢十幾年黎，一次又一次展露「妖魔化別人」既功架。
稍為有常識既人，都知邊個先係妖魔啦下話！
范太做左幾十年建制派既KOL，從政咁耐都緊緊跟隨黨既口徑，從無偏離過黨既指揮。估唔到佢臨別秋波之時，竟然打著紅旗反紅旗， 兜個圈點出中共當權者，以及一眾嘍囉「自我妖化」。果然，就黎唔撈既人先係最惡既。范太今次就親身示範畀大家睇，咩叫「官到無求膽自大」喇。
(2017–11–20)
傳送門：西米Go昔日文章
