Member-only story
呢期電視台又播〈倚天屠龍記〉，金庸咁多本長篇武俠小說，我最唔鍾意就係呢本。因為，主角張無忌呢個「俠二代」，條命生得好，奇遇又多，離地到乞人憎。
人物設定：
張無忌[無忌]，20碎，醫科天才生，IQ爆燈，乜都無師自通，花痴無數，江湖風頭躉，勁x100000000打得，一D刀唔串，阿爸阿媽出身黑白兩道既名門/望族，契爺留左把宇宙最強屠龍刀畀佢。bt frd係芷若、小昭同敏+蛛兒。
少年無忌既奇遇由佢係山窿執到〈九陽神功〉開始，然後無師自通呢本秘笈，從此有無限內力。無限內力係金庸武俠世界有幾重要？我用例子答你：〈天龍八部〉入面咁多個外星人，全部都係靠內功推動外星科技；〈射雕三部曲〉新舊五絕參加華山論劍，爭天下第一，亦以內功比拼。
「內功」呢樣野越多越著數，就好似現代人擁有金錢咁。仲要無限喎，仲唔玩晒？果D咩鋪王、玩具大王既仔女，乜都唔識唔緊要，佢地只需要掟舊錢出黎，買物業收租又好、劏場又好，自然識錢生錢。錢再多D，就搞初創孵化器、天使基金，大撒幣式掟落一堆新科技公司。玩法等同大包圍買馬，望搏扑中3T。咁就有人吹捧佢地做商業奇才。
武俠世界同現實世界，都一樣係四個字講晒：「本多終勝！」
講返本書先，之後，張無忌又係秘道執到明教不傳之秘〈乾坤大挪移〉。憑住先前〈九陽神功〉呢個「內功金手指」，短短幾個鐘就打爆機，唔使人教就練到〈乾坤大挪移〉第七層。Well，even當世第一高手、前任明教教主陽頂天，窮一生精力，都只係去到第四層咋！就係咁，張無忌一出道就橫掃六大派，二十歲空降明教做教主。
近年南韓/台灣時興果D肥皂劇，男主角係故事上半達至事業頂峰；下半部，自然就情情搭搭，專注發展感情線。
呢位二十幾歲既年輕才俊CEO，成名之後先後戀上元朝郡主趙敏、波斯混血靚女小昭、峨嵋派美人周芷若、仲有兩小無猜表妹殷離。四女性格不同，各有情趣。無忌既艷福，僅次於〈鹿鼎記〉入面，一拖七既MK仔韋小寶。
張無忌一生，除左十歲果年死老豆老母，兼中「玄冥神掌」差D一命嗚呼之外，一路都順風順水：要秘笈有秘笈、要寶刀有寶刀、要貴人有貴人、要權力有權力、要女人有女人。當一個平凡人二十出頭，大學畢業，工都可能未搵。張教主三扒兩撥就擠身人生勝利組，已經事業有成、武功第一、女朋友四個。
最屈機既係，張無忌既老豆老母死得早。唔似得大部份俠二代咁，要活係父母、師父陰影之下幾十年。等到班老野百年歸老，繼承人正式接收家業，可以隨心所欲，自己話事既時候，已經踏入老年，無幾多時間淨。（例如武當派創辦人張三豐，百幾歲都唔死，排佢條隊等上位既，不知等到何年何月先得嘗所望呀陰公。）
我細個睇〈倚天屠龍記〉，也曾經幻想自己係張無忌，過住令人羨慕既人生，覺得好過癮。人大左，就發覺劇情鋪排離地得過份，邊有可能呢頭九子連環加兩台花，果頭就自摸大四喜既先。可能，係我眼紅症發作，潛意識嫉妒「成功需父幹」一族掛。而家開電視睇新版〈倚天〉，只係為左一眾女主角，美女永遠都咁令人期待，right？
#倚天屠龍記 #刀劍若夢 #古代何猷君
(2019–4–26)
傳送門：西米Go昔日文章2019
