【TVB節目真係好難睇！】

2011年，邵逸夫同方逸華出售26%TVB（511）權益及清水灣地皮。撇開清水灣地皮估值，TVB當時價值62.6億港紙，相等於每股55元。今日，股價收報24元。唔夠七年，跌幅超過一半。

係香港電視台具絕對壟斷地位既TVB，業績同收視都持續下滑。公司管理層固然可以搬出十幾二十個解釋此乃非戰之罪：香港人有好多其他娛樂、個個玩電話玩social media唔得閒睇電視、上網同步睇（翻版）韓劇美劇中國劇太方便、香港人成日OT黃金時段都仲未返到屋企、政府發多左幾個免費電視牌增加競爭等等。

不過，幾多理由都好，都遮蓋唔到一個事實：而家「無線」既節目真係好趕客！

例如舊年年底，有個賀台慶特備節目「我愛EYT」，個trailer成棚耆英藝員係度重演「歡樂今宵」！嘩，翻炒四十幾年前既橋段都算，仲要用返當年既藝人，舊瓶舊酒，會唔會過份左呢？

一直以黎，無線既目標觀眾都係屋村師奶，所以專攻唔使用腦既節目：飲飲食食、烹飪、旅遊、遊戲……嘻嘻哈哈又一集（觀眾仲笑唔笑得出就另話）。而劇集情節就有特定formula：女人爭寵、男人爭身家、三角戀做副線、中間一定有誤會、結尾大團圓。

只可惜，時代會進步，自從有左互網網，師奶既見識都多左。睇過外國劇集，望返轉頭，連呢班忠實fans都覺得無線老土。TVB就退化到走去搶佔老人市場，一味玩懷舊玩復古：唔係唱舊歌，就講舊人舊事。所以，近年多左好多婦女尿滲、骨質疏鬆、關節退化、成人奶粉同紙尿片廣告。

你問十個後生仔，有十一個都會話你知睇TVB係一樣娘爆既事。就算有少數有興趣轉台都好，係朋輩壓力之下都會被逼唔睇，因為畀人知既話肯定會被恥笑。（無線管理層亦都知道問題所在，所以呢期狂谷旗下手機app Big Big Channel，但暫時未見可以扭轉年青人既睇法。）

再加上公司新老細取態明顯親中，越買越多中國製作既劇集、綜藝、音樂同紀錄片。而新聞部CCTV化，偏頗立場以致公信力包尾（註）。凡此種種，只會進一步趕走新一代觀眾。

觀眾缺乏新血，單靠舊客維持，呢間公司幾肯定只會越做越縮。曾經一度領導香港電視界既龍頭公司，其逐漸殞落既前景幾可寫在牆上。

註：

〈中大傳媒公信力調查：無綫電視排名再跌　電子傳媒「包尾」〉，立場新聞，2016-9-8日

#CCTVB #逼逼娼奴

(2017–11–24)

傳送門：西米Go昔日文章