【Fake News】所謂「港版羅拉」，只係公關鱔稿

話說舊年，有人係街頭影到一個小背心熱褲索女，拉住架「唧車」做跟車送貨，旋即成為網絡紅人。因為佢既裝束打扮似早年電視遊戲角色「盜墓者羅拉」，所以此女被稱為「港版羅拉」。

事隔大半年，有「香港01」記者無啦啦再煲起單新聞，聲稱搵到當時人做專題訪問，仲一連出左幾個跟進報道。羅拉唔單止係TVB東張西亮相，仲係中國、台灣引起網民一陣討論添。

正當女權人士吹奏「職場上男女平等」既時候，該報社有人係FB爆料，成單野只係公關鱔稿。（至於公關畀左咩好處個記者，就不得而知。）而家單假新聞紅左，負責採訪既資深記者，食埋報社既嘉許同獎金$15,000。佢個得戚態度令同事噁心咁話。

其實，公關同記者打好關系，互相利用都唔係咩秘密：「你畀得料我交功課，我幫你向讀者唱好。」你識做時我識做，維持一個長期互利關系，先係出黎做野襟撈之道。另一方面，公關亦唔係義工，唔會無啦啦主動搵人寫野既。今次要捧一個平凡既跟車女工上位，背後聘請公關果位老細究竟打緊咩算盤，就要等有心人再爆料至得喇。

講返「港版羅拉」篇鱔稿，細心既讀者一早就應該察覺，呢個故仔有古怪，佢話：

1. 好享受係男人堆中工作。
   （運輸業既男人堆唔同辦公室既白領男人堆喎。呢度個個麻甩佬都打大赤肋、大汗疊細汗、又臭又烏wer……一個女子要幾無矜持、要幾發姣、有幾恨男性荷爾蒙先會講得出「享受」二字呢？比在以前，佢公開講埋D咁唔要面既野，浸豬籠啦要！）
2. 好想去貨櫃碼頭拆貨、拆貨好正。
   （首先，寫稿果個知唔知咩叫「拆貨」？烈日當空，係差唔多密閉既鐵箱入面，連續做二三個鐘極度體力勞動工作。我識得既運輸工人，咩年紀都好，無一個會話「拆貨」好正。好想問羅拉一句，除左錢之外，「正」係邊呢？講出黎你覺得有人信？）
3. 好鍾意做運輸。
   （除左運輸業既老細同判頭，應該唔會有日日要落手落腳去做、只係逗份糧既工友，「鍾意」做跟車送貨囉。而實際上，呢份工，多數都係低技術、無技能既人先做。係為生活，無得揀先去做咋！）
4. 又儲到經驗、錢，又會學到唔同嘅嘢。
   （錢可能搵到。但經驗？學嘢？頭半年就有得著既。羅拉話自己係呢行做左八年，我都好想知，佢比起只係做左半年既新人，識多左咩野呢？）

運輸只係一份出賣勞力既普通職業。你篇文要做媒要讚，都要讚得make sense少少，自然少少，好嗎？