【facebook騙案】超平價買名牌？

報紙報道（註），有人貪平，係fb超低價買鑽石，幾舊水就有一卡。發現被人呃，粒「鑽石」係假野黎。

其實用下腦都知，真鑽石有價有市，邊有可能平賣？就算真係有商家周轉不靈急住套現、或有大批賊贓要散出去，都大把行家會以折讓價接貨。唔需要以不合理超賤價係fb搵街外人要。

我同一個做速遞公司既朋友講起，原來同類騙案舊年開始就有，全部經facebook「促銷」，產品五花八門：名牌衣物、首飾鐘錶、電子產品、化妝品、中藥保健品……，清一色都係由某一間網購公司寄出。

呢位朋友話，部份香港人都蠢唔晒，一時貪心係fb落完訂單，都會google下其他人評價以證真偽。所以，班速遞哥仔發現，越黎越多客戶選擇拒收，唔要件貨。要知道，佢地係靠送幾多貨計佣，收件人唔收件貨，速遞哥仔等同白行一趟，白做。我朋友就話，班同事多得呢類fb騙案唔少。

為免大家中伏，西米係呢度講解下騙案點運作啦：

Step 1：

騙徒係用分身fb開唔同網店，聲稱以超平價賣名牌，如下圖：

註：LOWA係德國名廠爬山鞋牌子，正價起碼過千蚊。

Step 2：

網店通常會話「順豐免運」送上門，並且COD（i.e. cash on delivery， 貨到付款）。

Step 3：

因為唔使畀錢先既關系，客戶戒心大大減低，一時貪念，就填寫個人資料落單。

Step 4：

到收貨果陣，記住，順豐速遞員係唔會容許你打開個盒睇過件貨先畀錢既（騙徒引你落order果陣，聲稱話可以）。你一係畀錢，一係直接拒收貨物。

Step 5：

如果你肯畀貨款並簽收，你就中伏。件野一定係淘寶貨假貨黎，同網店fb宣傳完全兩回事！

間網購公司就係博d人一時大意/一時貪心/唔想麻煩/唔識……而畀錢收貨。呢d垃圾淘寶野，賣咁既價，十個客之中只需要有三個中招，佢已經有賺。

要謹記，香港地，邊有咁大隻青蛙隨街跳？因為無得「先check貨後畀錢」，大家如有懷疑，收貨之前請睇一睇個包裝上寄件人資料。根據線報，疑似呃人網店多數會用以下資料：

「陳R 香港特別行政區九龍觀塘區觀塘鴻圖道58號5樓20室 852–81990518 可聯系whatsapp 56411682」

註：

〈1卡賣$499？ 夫fb網店買鑽戒送妻收貨驚呼：假得離譜〉，蘋果日報，2018–8–25

(2017–12–05)

傳送門：西米Go昔日文章