Member-only story
第十三回：冬令、夏令、慢左六分鐘。
係香港，除左個鐘壞或無電，你係無需要懷疑佢顯示既時間係咪錯。
但唔少位處高緯度既國家，因為受到日照長短既影響，實行冬夏令時間。（呢個係人類以自己生活模式去遷就大自然既行為）一年會有兩個禮拜日，國民要手動調教個鐘，較快、較慢一個小時。
歐洲國家就會係每年十月最後一個禮拜日撥慢一個鐘，係三月最後一個禮拜日撥快番一個鐘。2018年的冬令時間將由10月28日開始，即係話果一日，我會多左一個鐘頭時間。（唔使驚，到出年3月尾，如果我仲係德國住既話，我又會少返一個鐘架啦！）
除左轉夏令之外，近排歐洲國家亦無啦啦有「少左時間」既問題，好多電子儀器顯示既時間都慢左六分鐘：包括我屋企部焗爐、微波爐，原因竟然係同政治有關。
由於巴爾幹地區有好幾個國家係發電量同用電量上出現問題，導致歐洲二十五個國家的電力頻率慢左0.004赫茲(Hz)。由原先50Hz變成49.996Hz。
「重溫一下中四物理科先：
電力係以波浪型轉送（形象化既話，好似心電圖咁上上落落），會有一個特定的上下跳動頻率。全球大部份地區既電力都設定為50赫茲，意味著電力每一秒有五十次上下跳動。」
唔好睇少呢0.004Hz，電器、電子儀器係透過計算電流每秒改變方向的次數來確認時間，所以當電流的頻率低過50赫茲，就會導致計出黎既時間比正常慢。今次，就慢了 6分鐘喇！
如想了解更多「遲左六分鐘」，可參考呢度：
https://dq.yam.com/post.php?id=8954
(2018–3–17)
天亮了
朝早七點半 完全未天光
傳送門：西米Go昔日文章
傳送門：80後出走德國去讀書系列
