Member-only story
『二十幾年前開始，東方某城既市民忽然同時間染上一種怪病。呢個係慢性病，病毒源自鄰國，對人畜生命無大害；只會令患者漸漸五感麻木、思考無力、腦筋遲鈍、黑白不分。
城入面，有間藥廠，自疫症爆發起就出左隻藥，聲稱能治此病。城中市民好多都信，有買黎食，並跟足藥廠建議，有時一年食一次，有時一年食數次。佢地堅持又有耐性，其中唔少人一食就食左二十幾年。只是，各人病情不但從未無好轉，近幾年仲有加速惡化之勢。
長期得不到回報，再強的信念也會動搖。有部份病人開始質疑，既然廿多年臨床經驗已經證實，呢隻藥對治療怪病毫無幫助，點解仲繼續食呢？
唔知係因為怪病令人疏於思考，定係人本有惰性，大部份食開呢隻藥既市民都習慣成自然，對年年服藥行禮如儀。另一方面，藥廠心知客仔不滿，佢地為左鞏固客源，時不時係友好傳媒落膳稿、賣廣告；又搵黎大量打手於社交平台、網上論壇做洗腦宣傳。起初，佢地話此藥並非仙丹，並非食一次半次就見效，叫大家要有耐性。之後，佢地話外國有唔少成功病例，證明呢隻藥係work既，叫大家要有信心。到後期，越黎越多病人察覺到隻藥無料到，拒絕再服食，藥廠班打手見到事實擺在眼前，點遮都遮唔住，都唔好意思再吹噓藥既功效了。佢地改變策略，轉而恐嚇病人，話大家如果唔繼續幫襯，藥廠會執笠，以後大家連藥都無得食，後果不堪設想咁話。
一邊面對病毒越黎越惡，另一邊見到藥廠不思進取、從沒做好R&D；有辦法既人陸續搬離呢個城市。沒能力的大多數又如何自處？應該當果D爛鬼藥係符水、香爐灰，繼續按時服食求心安，然後自我感覺良好，話畀人知已盡力而為？定係不再自欺欺人，唔再畀錢藥廠賺呢？』
無錯，呢個故事所講既「藥」，就係香港獨有、和平理性非暴力非粗口、唱完今天我、畀埋掌聲自己、就各自返歸既嘉年華式遊行示威。而「藥廠」，自然就係指民陣、民主黨呢一類靠做反對派開飯既政治團體。上文寫於2019年6月8日，為左唔潑冷水、唔影響各位朋友參加「反送中」遊行既心情（註一），我特意等到六月九日之後先post出黎。
大家其實有無思考過，既然一隻藥食足二十幾年，都食你唔好，點解你仲要死人尋舊路，繼續聽人講，去食呢隻藥呢？
大家又有無思考過，經過二十幾年經驗，早就證實無論有幾多人出黎遊行，香港政府都只會當你行街散步，毫無政治壓力。點解「藥廠」仲要年復一年叫大家準時服藥？究竟佢地係真心相信，終有一日奇蹟會出現；定係不思進取，只為呃大家捐獻？抑或，佢地根本立心不良，謊稱和平抗爭有用，以騙取大家信任，為既係永續「社會運動」呢門獨市生意，唔畀其他人有機會插旗？（Well，支聯會就係一個好好既例子，單靠一年一度維園靜坐紀念六四，養活幾代政客。）從一個更陰謀論既角度睇，「病毒」與「藥廠」本是共生，有病毒先需要有藥廠。佢地會唔會同病毒源頭打龍通，一直用無用既安慰劑扮藥，刻意消耗、浪費大家有限畢直，同時不斷製造挫折，磨滅大家抗病意志？
「和平理性非暴力地讓愛與和平穿透坦克」？咪玩啦，早係一九八九年六月四日，有人已經試過呢招根本唔work。三十年後，我地面對同一個對手，憑咩認為用返同一招會成功呢？
註：
- 〈林鄭讚遊行市民「熱愛香港」 堅持如期修例是履行承諾〉，明報，2019–6–10
#今天我 #畀d掌聲自己 #七一再次黎返呢個地方唔好 #七一見十一見2020六四見
(2019–6–8)
傳送門：西米Go短評 #001–100，#101–200，#201–300
