【教學】人在香港，如何開立HSBC英國戶口，兼設定電話理財密碼

2023年3月實測

有見坊間KOL既教學片大部份都到係喉唔到肺：一係講D唔講D有頭無尾；一係就只識講表面野、無講關鍵位。佢地好多淨係識畀介紹link你click，只想賺介紹費。要賺我介紹費無問題，但都要先做好本份，。營養欠奉既話，不了。

西米為左開HSBC英國戶口，自己都浪費左唔少時間睇果堆KOL既Youtube片，發覺幫助不大，果D資訊太表面喇。倒頭黎都係自己落分開問職員先解決到問題。本篇教學文，希望幫到同樣在開立HSBC英國戶口路上遇到困難既大家。

一、你要有一個香港HSBC One戶口

私人銀行Private Banking、尚玉Jade、卓越理財Premier既用戶可以返出去先，呢度無你地既事喇，你地自己問返相熟客戶經理吧啦。

其他用戶可以埋黎繼續睇。首先，人在香港又想開一個HSBC英國戶口，你要有個香港既HSBC One戶口（即係以前既運籌理財Advance或綜合理財Intergrated account）。單單持有儲蓄戶口（無論簿仔定月結單）、支票戶口（港紙定美金）、定期戶口係唔夠既。無HSBC One戶口既話，請落分行開左先。

有左香港HSBC One，就可以去以下官網揀個海外戶口黎開：

開立滙豐海外銀行戶口展開環球理財 ─ 滙豐環球銀行服務

碌到中間有「開始申請」粒掣，然後下一版會問你係咪現有客戶、你而家係邊、你想邊個國家開戶口。答完就下一版。

現階段可以全程網上申請既海外戶口得加拿大、澤西島(Expat)、英國、新加坡、美國呢幾個地方。其他海外戶口要親身去中環總行國際業務部預約辦理。至於要準備咩文件、要入幾多錢之類，官網寫得好清楚，在此不贅了。

二、申請戶口之後

在上一段所講既網頁，按指示交齊資料，正常都無問題照批畀你的（除非唔正常）。個零星期之後就會收到幾樣野：Visa提款卡/記賬卡（debit card）、提款機密碼、小冊子。收唔到三寶既話，打電話去問。第四段我會講點打電話去英國匯豐。