Member-only story
早幾日生果報頭條（註一），有個身患罕見重病既BB仔需要二百萬醫藥費，希望大家多多益善，慷慨捐助咁話。
睇返內文，BB仔個阿爸2000年係中大醫學院畢業，一路係靈實護養院做醫生。數下手指，都做左醫生18年咯。BB仔個阿媽呢，就係小學教書，做到主任添。嘩！兩個人入息加埋閒閒地都廿萬一個月啦。拎兩球港紙出黎救個仔都拎唔到？仲要口口聲聲話：「肯定係我屋企冇辦法負擔」。唔係下話？香港地，連醫生老公配老師老婆，雙重鐵飯碗都無錢醫個仔要搵人捐，莫非係繼「醫生都買唔起樓」之後（註二），另一個天大既笑話？
老老實實，就算佢地一家平時真係無乜點淨錢，我又當佢地無物業拎去一按二按，以佢地咁solid既中產/專業人士背景，銀行借唔足，財仔都借畀你啦下話。使咩伸手問人捐呢？
不過講真，錢就無人會嫌多既。有咩好得過唔使還先。如果係我，有六個知名中大教授（註三）背書，又有傳媒朋友肯幫手頭版宣傳，叫人科水埋左張醫療單，我都lur飯應。我可以慳返筆之餘，一眾善長又拎到贖罪券/積到陰德/得到福報/訓得香甜，點計都係win win trade無得輸。
By the way，今次呢個病人只係一個十七個月大既BB，唔係咩名人政要，又未對社會有貢獻，更加唔係報紙暖流版入面老是常出現既好爸爸/孝順仔/家庭支柱，都照樣得到中大醫學院垂青，出面叫人募捐。真係恨死隔離！
香港地，日日都有窮人畀唔起高昂醫藥費，返屋企等死架啦。十年前，我有個朋友同呢位事主一樣咁慘，兩公婆打份普通文職工，個仔一出世就有先天性腎病，手術費要七十萬，咪一樣自己咬緊牙關解決。今次班中大教授個個唔幫，唯獨幫佢，仲要睇唔到佢一家有特別經濟需要喎！你話唔係因為佢阿爸係中大醫學院出身，所以親疏有別，都無人信咯。
明既，中國人最鍾意講：「識人好過識字」呀嘛！
後續：
呢單籌眾見報唔夠十二個鐘，李嘉誠就走出黎打爆個pool，捐二百萬（註四）。可能，佢怕單野發酵落去，市民會埋怨政府搞唔好公共醫療，乘機遷怒林鄭月娥。李生使少少碎銀，就保持社會和諧穩定，雙贏變三贏，yeah！
同一間病房，仲有三四個小朋友，同樣患有「神經母腫瘤」。呢幾個小朋友雖然無見報、佢地爸爸又唔係中大畢業既醫生，但一樣都有阿媽生架。唔知，李生/各位中大教授有無興趣順便幫埋佢地呢？
#張俊傑醫生 #識人好過識字
#張可仁小朋友 #成功需爸爸
註：
1. 〈接連患罕見病瀕癱 BB捱完一刀又生癌 中大六教授募捐救小可仁〉，蘋果日報，2018–11–232. 〈專業人士慨嘆買唔起樓〉，東方日報，2009–10–16
3. 中大副校長霍泰輝、前醫學院院長鍾尚志、現任助理院長古明達、助理院長莫仲棠、內科及藥物治療學系心臟科副教授李沛威，精神科學系臨床助理教授麥敦平
4. 〈李嘉誠捐200萬元救患癌小可仁〉，蘋果日報，2018–11–23
(2018–11–24)
傳送門：西米Go昔日文章
