第五回：暑假回港記。

80後出走德國去讀書

唔經唔覺去左德國讀書已經一年﹐前幾日首次再返香港。整個旅程都幾轉折：先由我住的城市搭Flixbus去柏林﹐再由柏林搭漢莎內陸機前往慕尼黑，再轉機返香港。你無睇錯﹐貴為歐洲大國德國既首都，柏林竟然無直航航班往來香港（香港都算係國際大城市啦）。

係柏林，上一次去波蘭就去Schönefeld Airport﹐今次就係去另一個機場Tegel Airport。後者比Schönefeld Airport更接近市區﹐傳統航空公司大多數的飛機都係用Tegel Airport起飛降落。

就咁睇個樣﹐你係唔會覺得Tegel係首都機場。無論外觀定規模﹐都好似一個二線城市既機場﹐仲停留係二十幾年前既啟德機場年代咁。

由於柏林同慕尼黑都屬於歐盟範圍﹐所以旅客係柏林無需任何邊境檢查﹐過保安部機就得。

往慕尼黑航班於晚上八點半起飛﹐預計晚上九點四十五分到連。再轉乘十點二十五分飛機返香港。有三十五分鐘畀我轉機，應該就係趕得切既。但正如人生一樣﹐邊會咁順利……

一到Tegal機場，就收到以下的SMS：

「Your flight LH2213 TXL-MUC XXAug 08:30pm is unfortunately delayed, estimated XXAug 09:00pm. Please observe the unchanged check-in deadline.」

我一睇完個SMS就即刻衝去counter﹐因為繼續搭呢一班機的話，去到慕尼黑就要十點十五分。一定趕唔切轉乘十點二十五分既機。代表我要係慕尼黑過一晚，第二朝先搭到飛機返香港。雖然，我大可以用EU261（註）去claim航空公司600歐，另加一晚酒店錢，但我唔想。

好彩，呢班機之前，原來仲有一架機去慕尼黑。漢莎地勤即時幫我轉早一班機離開柏林。

有別柏林機場，慕尼黑機場完全係一個現代化機場。到埗後第一件事，要正式出境﹐因為我將要離開歐盟。