Member-only story
第二十四回：「滯留」德國
上回講到，係武漢肺炎導致股市暴跌/油價負數/經濟衰退/失業率飆升……之前，好好彩畀我搵到份新工。按照原先計劃，四五月搞埋當地工作簽證，就會離開德國，搬去另一個國家。
不過，武肺導致全球封關，人地移民局暫時唔接受新申請，relocation計劃唯有hold住。新公司有實力之餘、亦有良心，唔似得香港顧主鍾意趁火打劫。係經濟環境極度不明朗之下，佢地無乘機freeze headcount，亦無收返埋個offer，反而叫我出住德國分部既糧，係德國work from home先。遲下人地開返關，再申請搬過去。
諗起2017年，決定要離開香港果陣，其實係無一個認真、切實既計劃，諗住見步行步而已。若然當日唔過黎德國，我銀行戶口會比而家多七位數港紙。於我黎講，並非一個小數目。不過，眼見香港今日搞成咁，我唔單止無後悔；仲覺得區區七位數，就可以換黎我同我下一代（如果生仔女）一生安穩生活，絕對係值得。
當議員講既野唔岩聽可以被DQ、議會主持人做既野唔配合政權可以被DQ、連考試題目睇落好似「傷害」到「十四億中國人感情」都會被DQ（註一）……嘩，呢個係一個咩世界？
我係讀理科出身，「評價」一詞好少係我讀書生涯中出現。你唔可以「評價」一個化學反應、一條數學算式好定唔好。但係我知道，文科就唔同。以歷史為例，是功是過不嬲都係由後人評價，後世反覆討論之後，自有定論。
睇返今日DQ試題既記者會，教育局高層公然話：「有D歷史事件唔可以開放討論。」係咪代表從今日起，某部份歷史（甚至全部歷史）由政權「一鎚定音」，有晒官方解讀、官方答案？既然「開放討論」成為禁忌，等於「妄議乜乜」，唔容許批判思考同評價，咁仲要歷史科/歷史系把鬼咩，唔好浪費教師同學生時間啦。好似清華大學咁，直接摺埋新聞與傳播系咪仲好（註二）。反正中國都無新聞自由，間間傳媒都係「傳發」中共新聞稿之嘛，做記者使乜要讀傳理系、新聞系，識得用「外交部耿爽生成器」（註三）就交到功課啦。
最後，不得不提蘋果日報最忠實粉絲 689係facebook抽火水，佢咁樣講：
請教協和所有其他為DSE歷史科試題辯護的人回答這個問題。
在德國或以色列的歷史科公開考試會出現以下的試題嗎？
「『1941–1945年間，納粹為猶太人帶來的利多於弊。』你是否同意此說？」
