Member-only story
「撚字」者，雕琢文件、email、信件之用字也。不同用字，有不同演譯空間 。公營機構的官僚們，日常主要工作就是「撚字」。其目的，是要找出最安全字眼，令他們處於最有利位置。有時候，他們純粹為了咀上討便宜。
在這個東方小城，女市長出身官僚系統。一生人之能夠官運亨通，必定精於「撚字」之道。佢堅持只「暫緩」不「撤回」，路人皆知係想保留主動權，留條後路畀自己，話畀大家知修例隨時可以捲土重來。雖則，主觀願望同客觀事實係咪一樣，就係另話喇。
「撚字」，我相信大家都做過。平時對上司、下屬、同事或許有作用。但係千祈唔好自以為是，以為係自己手「字」「撚」得好使然。其實，只是基於各自身份/權力/位置，大家各取所需，鬥而不破而已。當老屎忽們跳出體制之外 （ 尤其面對廣大民眾 ），呢D「撚」人行為只會惹人討厭。
有少少common sense既人都知道，Hong Kong is NOT China, yet，政策唔係下下都格硬黎就得既。經過連續兩次過百萬人參予既特大遊行、一次開晒槍既警民衝突、再加議會大樓被攻陷，呢條「送中條例」，幾可肯定與2003年政府試圖硬闖既「二十三條」一樣，成為社會禁忌，需要長期封印。
初初，我地都仲可以體諒女市長能力不足，錯估形勢。我地理解，佢反反複複咁話「停止」、「暫緩」、「失效」、「唔會重啟」、「無再推時間表」……係試圖為呢個政治任務留下一個活口。但係，當事態更嚴峻，佢仲仍然唔肯正面回應市民，唔肯講「撤回」二字，就變成「死要面」之舉了。呢位自跨年年考第一既社會精英，與一百年前既孔乙己 — 堅持「竊書」唔係「偷書」 — 又有咩 分別呢？
女市長寧願唔湯唔水，做show做一半，其實，仲有另一重「撚字」意義：今次上市失敗，係因為市況唔就，我地先至緩一緩，唔做住，並非做錯左要收返。拿，既然政策本身無錯，提出政策果個（i.e.佢自己）自然都無錯。咁就無人要孭鑊啦，right？拎住呢個解讀，佢面對幕後老細果陣，就易交待好多喇。
作為一個公司高層/政府高官，肯定要以解決問題為先。你堅持自己正確，繼續走落去又好；你作出讓步都好，都唔應該係動蕩紛爭之時，仲係度自顧咬文嚼字（juggling with semantics），跌落地想拿返渣沙。呢D行為，我地稱之為「走住屌」（即係一個人理虧/衰左，一邊逃離，一邊口噏噏拎尾彩）。
妹仔，就係有「妹仔格」。一個人做左四十年妹仔，就算有幸得到主人賞識，坐上高位話得下事，佢都只會係一個高級妹仔，做唔成大事。
政府元首有如老細，唔只係高級妹仔咁簡單。老細係要有決斷力/做大事/做實際野。你幾時見過Donald Trump會因為「暫緩」定「撤回」對華關稅，而在twitter嘮嘮叨叨呢？
(2019–7–4)
傳送門：西米Go短評 #001–100，#101–200，#201–300
傳送門：為香港的老屎忽擔心
