係人都知，坐擁慣性收視既無線不嬲惡晒。佢一直都唔准所以本地藝人（就算唔係佢旗下都好）亮相其他本地電視台節目，又唔准佢地以廣東話接受其他電視台訪問，邊個唔聽話就封殺。因為咁多年黎香港實際上得佢一間免費電視台係有人睇，所以絕大部份藝員、歌星、明星，無論係出面幾紅都好，為左曝光，為左要入屋宣傳，都唔會得罪呢個好主要既宣傳渠道，唔會破壞無線訂落黎不平等既規矩。
佢地崇尚「搵食姐，犯法呀」呢個香港人最核心既「返工至上價值觀」，我明既。之但係搵食還搵食，都請顧下自己副食相。好似曾志偉之流，過去年年係無線做大show司儀，一有機會實擦晒鞋、表晒忠，開口埋都話「TVB係我屋企」、「TVB係大家庭」、「同公司好有感情」……聽落都噁心。
大公司既僱傭關系從來都係明碼實價一買一賣，各取所需。「人力」只係一種「資源」，都唔再講人情味咯。更何況出名勢利現實既娛樂圈？曾志偉呢D，一早上晒岸，唔係無錢開飯既，今日咪一樣「利字擺前頭，情義放兩邊」，身體很誠實咁走去隔離台做世界杯節目（註一）。
相比之下，同期另一個宣傳，杜汶澤果句「ViuTV畀少個崩我都唔會笑。」就顯得無咁討厭。起碼，佢表裡如一，無講大話。
#獎門人現身Viutv #識時務
註：
- 〈ViuTV俄羅斯搞決賽派對 曾志偉「現身」贈慶谷收視〉，HK01，2018–7–3
(2018–7–12)
傳送門：西米Go昔日文章2019
傳送門：【TVB節目真係好難睇！】
