Member-only story
近日香港，最重要既本地大事，莫過於政府要修改〈逃犯條例〉。
一眾高官權貴，呢期日日輪流上鏡，力sell修例。情況有如舊年為趕香港人返上去，而推銷大灣區既氣勢。唔使問阿貴，今次一定又係中國政府交落黎既政治任務。咁多個sale屎入面，林鄭月娥本人最賣力。佢一邊打橫黎，係議事堂駁斥中外反對聲音「全屬廢話」（註一）；另一邊不忘扮好人，話係「同理心和憐憫心驅使」（註二）佢堵塞漏洞。一人分飾兩角，紅面白面佢唱晒，認真專業。
雖然明知係政治演員/騙子做緊戲，但我一聽見「同理心」、「憐憫心」出自林鄭把口，就無名火起，特別哽耳。
大家仲記唔記得，兩個月之前，有隻狗上左一艘泰國貨船過黎香港。艘船泊岸無幾耐，船員已經搵到身處泰國狗主，狗主亦即時叫香港既朋友，搵議員幫手，聯絡相關政府部門。佢仲買埋機票，想盡快接返呢隻搭錯船既狗走。結果呢？隻狗上岸當晚，就畀漁農自然護理署「人道毀滅」。佢地連身體檢查都費事做，左一句無健康/入境證明，右一句泰國屬於瘋狗症高危國家，按照程序隻狗就唔留得喇！（註三）
同類事件，如果發生係外國會係點？前幾日有隻花貓，搭中國貨船去意大利。當地海關並無因為隻貓來歷不明而要「人道處理」，佢地既程序比港式人道更人道：先送去動物保護中心隔離四十五日，如健康無問題就幫佢打預防瘋狗症疫苗，之後可以畀人領養。海關人員仲幫花貓改左名，叫Cina添！（註四）
同理心又好、憐憫心都好，並唔係得把口講，係要身體力行做出黎。
香港班官僚，平時連一隻無攻擊性既小動物都容不下，而家學咩人講呢D廢話？林鄭月娥已經唔止一次利用市民既同情心。上次，佢拒絕檢討每日一百五十個單程證配額，同樣係議事堂搬「同理心」出黎做籍口，叫市民唔好阻礙中國人落黎香港「家庭團聚」。大家聽見我地市長屢出此等無恥之言，點會唔㷫先？
p.s. 恭喜小花貓Cina（讀音「支那」）成功逃離中國，移民意大利。好在佢無搭錯船去香港咋！
#二次投胎 #成功達陣 #移民去文明之地
註：
- 〈 反駁有指《逃犯條例》刻意剔除內地 怕內地法制 林鄭：全屬「廢話」〉，立場新聞，2019–5–9
- 〈林鄭：修《逃犯條例》是同理心和憐憫心驅使〉，Line Post，2019–3–26
- 〈Puss-in-BOATS: Kitten from China miraculously survives after being trapped in a shipping container for 45 days without food and drink — and then finds itself in ITALY〉，Daily Mail UK，2019–5–9
- 〈泰國狗狗疑誤闖貨船來港慘遭「處決」 漁護署證「已人道方式處理」〉，蘋果日報，2019–3–13
(2019–5–10)
傳送門：西米Go短評 #001–100，#101–200，#201–300
