【涼涼地，又係到打邊爐既時候喇！】

天氣轉涼，代表踏入瘋狂打邊爐既季節。極邪惡既乜丸物丸係必食之選！無他，呢D再造肉本身落重調味，自然令人食唔停口。究竟龍蝦丸、海膽丸呢D新興丸類係咩來頭呢？（註一）

1. 龍蝦球

無龍蝦，但有蝦蟹成份。（請注意，只係「成份」，無話一定用蝦肉蟹肉，可以係內臟、殼之類。）肥豬肉佔比高達三分之一（註二）！

2. 海膽丸

一樣無海膽，但有乾貝、扇貝同蜆肉。

3. 芝心丸：

主要成分係魚肉粉、薯仔粉，屬低脂但熱量唔少（註三）。大多數台灣貨含芝士成份（又係成份）；中國貨就差D，會用奶粉或芝士合成物代替。

另外，為左食落較滑、較彈牙，好多丸類都會落肥豬肉。而爽脆既飛魚子可以令丸類口感有層次，加上台灣盛產飛魚，廠商通常拎佢黎做各式各樣有餡丸類入面既餡。

打邊爐落肉丸好似係華人先有既文化，所以肉丸主要產自華人國家。一般黎講，台灣同本地丸質素好過中國丸，價錢亦會貴D。精叻既香港小店同食肆老闆善於賺到盡，佢地好多時會搏大霧，劣貨撈埋落靚貨一齊賣，反正大部份師奶阿伯都唔識分/食，為免畀人呃，我地應該點分辦呢？

1. 睇外表

中國丸表面較光滑，粒粒一樣；台灣丸有凹凸坑，每粒丸既形狀不一。

2. 聞氣味

烚果陣，中國丸有大陣腥味。

3. 試下食

基於化學野既多寡、質素同種類，食完中國丸之後，條脷好多時會有鞋鞋地既感覺，亦會口渴。

呢個年代，真正自家製既手打肉丸已經唔多見，係坊間買到既，多數係工廠用麵粉、豆粉、馬鈴薯粉等啤出黎。加入濃縮調味劑造出相應味道，例如雞湯粉、牛肉粉、甜味劑。當然唔少得色素、抗氧化劑、防腐劑呢堆化學野。新鮮材料含量根本唔多。好多丸都高熱量、高脂、又高鈉（買之前睇下營養標籤，實嚇死你）。大家打邊爐果陣都係淺嘗好喇。

註：

1. 〈凍丸表面光滑易中伏 海膽丸成份無海膽其實係咩？〉，蘋果日報，2018–11–19

2. 〈邊爐最易肥〉，東方日報，2006–12–4

3. 〈肥牛 VS 芝士丸　一圖睇晒打邊爐致肥食物〉，HKET，2016–12–12

(2018–11–22)

傳送門：西米Go昔日文章